Va ŭkrainskaj Zatocy try čałavieki zahinuli, padarvaŭšysia ŭ mory na minie
U pasiołku Zatoka Adeskaj vobłaści Ukrainy ŭ niadzielu, 14 žniŭnia, piać čałaviek praihnaravali zabaronu na vychad na marski bierah i paciarpieli pry vybuchu na plažy, troje ź ich zahinuli. Pra heta paviedamiła pres-słužba Nacyjanalnaj palicyi.
Jak ustanaviła śledča-apieratyŭnaja hrupa, niekalki čałaviek, jakija pracavali na budoŭli, vyjšli na plaž, niahledziačy na zabaranialnyja znaki i sihnalnuju stužku, i pajšli kupacca ŭ mory. Zahinuli try čałavieki, jakija byli ŭ vadzie: heta mužčyny va ŭzroście 25, 32 i 53 hadoŭ z Čarnihaŭskaj, Zaparožskaj i Žytomirskaj abłaściej. Cieły dvuch dastali ŭ toj ža dzień, małodšaha ŭdałosia znajści tolki nazaŭtra z dapamohaj kvadrakoptara.
Jašče dva čałavieki — 43-hadovy mužčyna z Čarnihaŭskaj vobłaści i 44-hadovaja žančyna z Kijeŭskaj — byli pobač na bierazie i pry vybuchu atrymali traŭmy, jany zaraz znachodziacca ŭ balnicy.
Uzbudžanaja kryminalnaja sprava pa fakcie niaščasnaha vypadku. Palicyja pakul što kaža pra vybuch «nieviadomaha pradmieta», bo jašče nie praviedzienyja ekśpiertyzy, adnak, chutčej za ŭsio, vybuchnuŭ adzin z snaradaŭ, jakimi zaminiravana ŭźbiarežža.
«Jašče raz padkreślivajem: u vadajomach Adeščyny kupacca zaraz niebiaśpiečna i zabaroniena. Plažy i ŭźbiarežža rehijona abaronienyja i asnaščanyja vybuchovymi pryładami», — skazała pres-sakratar miascovaj palicyi.
Adnak na mnohich ludziej hetyja zakliki i navat realnyja śmierci ludziej nie robiać nijakaha ŭražańnia. Bo heta ŭžo nie pieršy padobny vypadak.
U suviazi z adnym z papiarednich incydentaŭ vielmi emacyjny zvarot da hramadzian zapisaŭ kiraŭnik Adeskaj abłasnoj vajennaj administracyi Siarhiej Bratčuk. Jon źviarnuŭ uvahu, što ŭ mory rasstaŭlenyja miny dla taho, kab abciažaryć vysadku rasijskaha desantu i što pra heta hramadzianie šmat razoŭ papiaredžvalisia. Ale niekatoryja ŭsio adno, maŭlaŭ, šukajuć na plažach Adeskaj vobłaści premiju Darvina. Jak vyhladaje, pošuki praciahvajucca i nadalej.