U Rasii prapanavali zamianić druhoha piłota ŭ samalotach štučnym intelektam
Ministerstva pramysłovaści i handlu Rasii abviaściła konkurs na raspracoŭku da 2024 hoda technałohii, jakaja dazvalaje zamianić druhoha piłota ŭ samalotach na virtualnaha. 9 žniŭnia paviedamleńnie ab konkursie koštam 2,9 miljarda rubloŭ źjaviłasia na sajcie dziaržzakupak.
Ministerstva prahnazuje, što za košt vykarystańnia štučnaha intelektu ŭ avijacyi ŭžo ŭ 2030-ja hady kamiercyjnymi pavietranymi sudnami zmoža kiravać adzin člen ekipaža. «Heta, z adnaho boku, dazvolić istotna źmienšyć košt ekspłuatacyi pavietranych sudnaŭ, a z druhoha — zapatrabuje praviadzieńnia mierapryjemstvaŭ, jakija vyklučajuć istotnaje pavieličeńnie nahruzki na adzinaha piłota», — skazana ŭ materyjałach zakupki.
Mižnarodnyja praviły biaśpieki palotaŭ praduhledžvajuć, što ŭ kabinie piłota pavinny znachodzicca nie mienš za dva čałavieki.