Rasijaninu ŭ Biełarusi pahražaje da troch hadoŭ źniavoleńnia pa «narodnym» artykule
Hramadzianina Rasii Siarhieja Baršča zatrymali na pracy ŭ Minsku jašče 21 lipienia. Jak paviedamiŭ «Biełsatu» siabar siamji Siarhieja, mužčynu schapili supracoŭniki HUBAZiKu padčas pracoŭnaha dnia na zavodzie šaścierniaŭ. Doŭhi čas svajaki nie mahli daviedacca, dzie znachodzicca zatrymany: nijakich źviestak milicyja pra jaho nie davała.
Pra los Siarhieja stała viadoma tolki 23 lipienia.
24 lipienia na kanale siłavikoŭ źjaviŭsia «pakajanny» rolik, dzie Siarhiej raskazvaje, jak braŭ udzieł u mitynhu i navat vyjšaŭ na prajeznuju častku, a taksama byŭ padpisany na «destruktyŭny kanał». Sa słovaŭ Siarhieja vychodzić, što mienavita za heta jaho i zatrymali siłaviki.
U paście z «pakajannym» videa taksama apublikavanyja fota, dzie čałaviek, padobny da Baršča, biare ŭdzieł u mirnym šeści.
Blizkija źviarnulisia ŭ ambasadu Rasii ŭ Biełarusi, kab tyja ŭrehulavali situacyju ci choć niejak dapamahli.
Mužčynu pakul vystaŭlajuć abvinavačańnie pavodle art. 342 KK RB («Arhanizacyja i padrychtoŭka dziejańniaŭ, što hruba parušajuć hramadski paradak, abo aktyŭny ŭdzieł u ich»).
Viadoma, što Siarhieja źmiaścili ŭ karcar razam ź jašče 11 asobami. Kolki času jon tam prabyŭ, nieviadoma.
