Skandynavy — samyja ščaślivyja narody śvietu. Voś niekalki sakretaŭ, jak im heta ŭdajecca
Užo šmat hadoŭ datčanie traplajuć u rejtynh samych ščaślivych narodaŭ śvietu. Navat doŭhija miesiacy kavidnaha łakdaŭna, jak kažuć navukoŭcy, amal nie pachisnuli psichičny stan žycharoŭ Danii. Jak im heta ŭdajecca?
Fota: pixabay.com
Majk Vikinh, stvaralnik i vykanaŭčy dyrektar Instytuta daśledavańnia ščaścia ŭ Kapienhahienie, tłumačyć, što datčanie vielmi dobra bačać roźnicu pamiž dvuma paniaćciami — dabrabytam i bahaćciem, piša New York Times.
Zhodna ź im, datčanie lubiać rabić značnyja dla ich rečy na adkrytym pavietry i ŭ atačeńni inšych ludziej. Naprykład, sam Vikinh zajmajecca razam ź siabrami padvodnym palavańniem, a potym jany razam smažać svoj ułoŭ, abo mohuć vypić piva ŭ bary.
Vikinh raić vyłučać čas na toje, kab padumać, jakimi vartymi ŭvahi rečami vy mahli b zajmacca razam ź inšymi ludźmi, i dobra, kali havorka budzie iści pra niešta biaspłatnaje. Naprykład, čamu b vam nie schadzić z kimści jašče na špacyr ci ŭ pachod?
Druhi dacki sakret ščaścia — heta znakamitaje paniaćcie chiuhie, jakoje Vikinh charaktaryzuje jak «mastactva taho, jak atrymlivać zadavalnieńnie ad maleńkich žyćciovych pryjemnaściaŭ». Chiuhie — heta pra stvareńnie kamfortnaha asiarodździa vakoł siabie, jakim možna ciešycca jak u adzinocie, tak i ź blizkimi ci siabrami.
Ludzi inšych nacyjanalnaściej taksama mohuć atrymlivać asałodu ad chiuhie. Kali vy zdolejecie stvaryć vakoł siabie ŭtulnuju, pa-sapraŭdnamu chatniuju atmaśfieru, heta moža dapamahčy vam lepiej adnaŭlać svaje siły.
Dla skandynavaŭ taksama charakterny vysoki ŭzrovień davieru adzin da adnaho i da svajoj krainy. Emi Kłotuorci, prafiesarka Kapienhahienskaha ŭniviersiteta, tłumačyć hetak tak: «Jość adčuvańnie, što kali ŭ ciabie prablemy, inšy čałaviek moža dapamahčy tabie pryjści ŭ siabie. My addajom pieravahu kalektyŭnamu paniaćciu «my», a nie [indyvidualnamu] «ja».
Ekśpierty časta kažuć, što hetaje pačućcio supolnaści moža pačynacca na indyvidualnym uzroŭni. Naprykład, kab adčuć svaju prynaležnaść da inšych ludziej, možna zaniacca vałanciorstvam, rabić dobryja spravy ci prosta źviartać bolš uvahi na znosiny sa svajakami i siabrami.
Dakazana: aptymisty žyvuć daŭžej. Raskazvajem, jak «prakačać» aptymizm
«Chto viedaje, navošta žyć, moža vytrymać luboje jak». Psichołah Viktar Frankł pra toje, jak vyžyć u turmie
