«Viasna»: Za antyvajennyja pratesty zatrymlivali bolš za 1000 čałaviek, zaviali 32 kryminalnyja spravy
Pravaabarončy centr «Viasna» prainfarmavaŭ čatyroch Śpiecyjalnych dakładčykaŭ AAN: pa pytańni ab stanoviščy ŭ halinie pravoŭ čałavieka ŭ Biełarusi, ab zaachvočvańni i abaronie prava na svabodu mierkavańniaŭ i ich svabodnym vykazvańni, ab pravach na svabodu mirnych schodaŭ i asacyjacyi, ab hvałcie ŭ dačynieńni da žančyn — z nahody administracyjnaha i kryminalnaha pieraśledu ludziej u Biełarusi, jakija vykazali antyvajennuju pazicyju.
Ambasada Ukrainy ŭ Minsku, 27 lutaha
«Viaśnie» viadoma pra bolš jak 1 000 zatrymanych za ŭdzieł u mirnych akcyjach pratestu suprać vajny i pra 32 kryminalnyja spravy za antyvajennyja aktyŭnaści z 24 lutaha 2022 hoda. Pry hetym pravaabaroncy adznačajuć, što heta mohuć być niapoŭnyja źviestki, bo ŭ šmatlikich vypadkach sudździ tajemna pravodziać zakrytyja pasiadžeńni ŭ režymie videakanfierencyj biez abviaščeńnia daty i miescy sudovaha razhladu.
Pravaabaroncy źviartajuć uvahu Śpiecdakładčyka pa pytańni ab hvałcie ŭ dačynieńni da žančyn, što siarod zatrymanych za antyvajennuju pazicyju šmat žančyn. Viadoma prynamsi 278 takich vypadkaŭ. Zatrymanyja paviedamlali pra ździeki z boku milicyi i nievynosnyja ŭmovy ŭtrymańnia ŭ izalatarach, kali ŭ kamieru zasialali ŭ try-čatyry razy bolš žančyn, čym raźličana spalnych miescaŭ. U izalatarach žančyny spali na padłozie, nie atrymlivali ježy i pitnoj vady, hihijeničnych srodkaŭ, ich nie vadzili ŭ duš i na špacyry.
Taksama viadoma pra šmatlikija kryminalnyja pieraśledy ŭ suviazi z antyvajennymi vykazvańniami i inšymi sposabami vykazvańnia salidarnaści z Ukrainaj: za antyvajennyja i antyrasijskija vykazvańni ŭ sacsietkach, raspaŭsiud infarmacyi pra pierasoŭvańnie rasijskich vojskaŭ na terytoryi Biełarusi, sproby pieraškodzić pierasoŭvańniu vajskovaj techniki na čyhuncy.
U jakaści prykładaŭ pravaabaroncy pryviali spravy suprać palitźniavolenych Danuty Pieradnia, asudžanaj da 6,5 hadoŭ kałonii za repost tekstu, u jakim u rezkaj formie krytykavalisia dziejańni Uładzimira Pucina i Alaksandra Łukašenki pa raźviazvańni vajny va Ukrainie; žurnalista Juryja Hancareviča, asudžanaha da 2,5 hadoŭ kałonii za fota rasijskaj vajskovaj techniki; studenta Alaksandra Zahdaja, asudžanaha da 2,5 hadoŭ kałonii za «źliŭ» źviestak pra vajskovyja samaloty, «rejkavych partyzanaŭ» Dzianisa Dzikuna, Aleha Małčanava, Dźmitryja Raviča, Jaŭhiena Minkieviča, Dźmitryja Klimava, Uładzimira Aŭramcava i inšych.
