Łandśbierhis: Padčas vajny Rasii z Ukrainaj my nie pavinny zabyvacca i pra biełarusaŭ
Z nahody druhoj hadaviny pačatku pratestaŭ suprać niepryznanych Zachadam prezidenckich vybaraŭ u Biełarusi ministr zamiežnych spraŭ Litvy Habryeluc Łandśbierhis u paniadziełak sustreŭsia sa Śviatłanaj Cichanoŭskaj i inšymi pradstaŭnikami biełaruskaj hramadzianskaj supolnaści, piša Delfi.lt.
Habryelus Łandśbierhis. Fota: EPA
Pa słovach kiraŭnika litoŭskaj dypłamatyi, raspačatyja dva hady tamu masavyja pratesty stali vidavočnym manifiestam imknieńnia naroda Biełarusi da svabody, prykładam taho, jak hodna, mužna i miralubna možna zmahacca za svaje svabody i prava.
«Padčas vajny Rasii suprać Ukrainy my taksama nie pavinny zabyvacca pra Biełaruś. Jak i dva hady tamu, siońnia kraina maje patrebu ŭ padtrymcy demakratyčnaha śvietu. Biełaruś, jakaja imkniecca da svabody, pavinna zastavacca ŭ paradku dnia jak litoŭskaj, tak i mižnarodnaj palityki.
Ja vieru, što zhurtavanyja namahańni demakratyčnych sił Biełarusi i ŭsich nas dapamohuć realizavać hałoŭnuju metu — jak maha chutčej pravieści demakratyčnyja vybary ŭ krainie», — skazaŭ Łandśbierhis.
Taksama z udzielnikami sustrečy abmiarkoŭvałasia tema palitviaźniaŭ, jakija znachodziacca ŭ turmach biełaruskaha režymu. Łandśbierhis vykazaŭ padtrymku žadańniu biełaruskaha naroda supraćstajać udziełu biełaruskaha režymu ŭ ahresii Rasii suprać Ukrainy, a taksama namahańniam Kramla pa źniščeńni niezaležnaści Biełarusi.
