Lubicie sačyć za samalotami palitykaŭ i znakamitaściaŭ praz anłajn-trekiery? Raskazvajem, jak jany pracujuć
Apošnim časam nabirajuć papularnaść prahramy, jakija adsočvajuć, kudy lacić toj ci inšy bort. Vice raskazaŭ, jak jany pracujuć.
Fota: wikimedia.org
Bolš za 700 tysiač čałaviek adsočvali trajektoryju palotu amierykanskaha vajennaha samalota, na borcie jakoha znachodziłasia śpikier Pałaty pradstaŭnikoŭ Nensi Pełosi. Jana pryziamliłasia na Tajvani ŭ 23:50 pa miascovym časie, što zrabiła Pełosi pieršym vysokapastaŭlenym amierykanskim čynoŭnikam, jaki naviedaŭ vyspu za apošnija 25 hadoŭ.
Ludzi sačyli za chodam palotu na FlightRadar24, sajcie adsočvańnia palotaŭ, jaki vykarystoŭvaje danyja z adkrytych krynic. FlightRadar24 i padobnyja instrumienty, takija jak ADS-B Exchange, byli asabliva karysnyja ŭ apošnija tydni, bo ludzi vykarystoŭvali ich dla adsočvańnia maršrutaŭ pryvatnych samalotaŭ u žyvym efiry. Ludzi sačyli za Tejłar Śvift i Kajli Džeńnier, samalotami rasijskich aliharchaŭ, a ciapier i za Nensi Pełosi.
Padčas palotu Pełosi na FlightRadar24 było tak šmat naviedvalnikaŭ, što na hałoŭnaj staroncy sajta źjaviłasia paviedamleńnie: «My nazirajem vysoki popyt siarod karystalnikaŭ, jakija chočuć atrymać dostup da našych pasłuh. U jakaści časovaj miery, kab paźbiehnuć zbojaŭ u pracy sajta, stvorany pakoj čakańnia. Karystalniki mohuć uvajści ŭ sistemu, kab abyści čarhu».
FlightRadar24 abjadnoŭvaje danyja ź niekalkich krynic: ADS-B, MLAT (multyłateracyi) i danyja radaraŭ, ahrehavanyja z raskładam i infarmacyjaj pra status rejsaŭ ad avijakampanij i aeraportaŭ.
ADS-B aznačaje «aŭtamatyčnaje zaležnaje nazirańnie-viaščańnie», heta technałohija, jakaja dazvalaje adsočvać samalot z dapamohaj spadarožnikavaj navihacyi abo inšych datčykaŭ. Tranślatar na samalotach pieradaje sihnał, jaki źmiaščaje infarmacyju pra miescaznachodžańnie samalota, jaki paśla prychodzić na pryjomnik, padłučany da FlightRadar24. Pa zakonie bolšaść samalotaŭ musiać mieć abstalavańnie ADS-B, u tym liku ŭ ZŠA i Jeŭropie.
Jak pracuje ADS-B. Fota: spire.com
FlightRadar24 filtruje niekatoryja danyja, uskładniajučy abo robiačy niemahčymym sačeńnie za pryvatnymi samalotami, ale inšy sajt pad nazvaj ADS-B Exchange dazvalaje karystalnikam adsočvać pryvatnyja samaloty, jakija naležać znakamitaściam i aliharcham. «ADS-B Exchange nie filtruje danyja, jak robić bolšaść inšych sajtaŭ pa adsočvańni palotaŭ, jakija nie dzielacca danymi pra vajennyja abo niekatoryja pryvatnyja samaloty», — havorycca na sajcie.
MLAT — heta multyłateracyja, jakuju vykarystoŭvaje FlightRadar24 dla vyznačeńnia miescaznachodžańnia samalotaŭ, jakija nie majuć prymalnikaŭ ADS-B. MLAT vykarystoŭvaje mietad pad nazvaj Time Difference of Arrival (TDOA, časavaja roznaść prybyćcia), jaki vymiaraje čas, nieabchodny dla atrymańnia sihnału ad samalota sa starych pieradatčykaŭ, kab vyznačyć jaho miescaznachodžańnie (prykładna tak ža pracuje tryanhulacyja, jakaja dazvalaje vyśvietlić miescaznachodžańnie čałavieka pa jahonym smartfonie — zaŭv. NN).
Jak pracuje MLAT. Fota: researchgate.net
FlightRadar24 maje dadatkovyja krynicy danych, uklučajučy spadarožnikavaje sačeńnie, jakoje atrymlivaje dadzienyja sa spadarožnikaŭ z pryjomnikami ADS-B. Hetyja spadarožniki dapamahajuć pavialičyć achop palotaŭ nad akijanami ci tam, dzie naziemny pryjom niemahčymy. Sajt taksama atrymlivaje apieratyŭnyja danyja ŭ Paŭnočnaj Amierycy ad radaraŭ i z Open Glider Network (OGN), jakaja źjaŭlajecca adzinaj płatformaj nazirańnia za małymi samalotami.
Na sajcie FlightRadar24 vy možacie ŭbačyć kartu śvietu, pakrytuju abrazkami nievialikich samalotaŭ. Na kožny samalot možna nacisnuć, i paśla nacisku na jaho źjaŭlajecca akno ź infarmacyjaj pra palot, uklučajučy zapłanavany i faktyčny čas uźlotu i pasadki, miescaznachodžańnie samalota na maršrucie palotu, infarmacyju pra samalot, danyja pra chutkaść i vyšyniu, a taksama krynicu danych, ź jakoj była atrymanaja infarmacyja. Bolšaść značkoŭ samalotaŭ žoŭtaha koleru, što aznačaje, što samaloty adsočvalisia z naziemnych radyjołakacyjnych stancyj, a sinija znački pakazvajuć samaloty, jakija adsočvalisia sa spadarožnika.
Jan Piatčanik, pradstaŭnik FlightRadar24, paviedamiŭ Motherboard, što sajt pracuje nad pavieličeńniem svaich resursaŭ u suviazi z «nadzvyčajna vysokaj cikavaściu» da adsočvańnia palotu Pełosi.
«Siońniašni palot staŭ samym papularnym za ŭsiu našu historyju. Za pasadkaj samalota ŭ Tajbei sačyli krychu bolš za 700 tysiač čałaviek. Druhim pa kolkaści adsočvanńniaŭ u žyvym efiry byŭ palot Alaksieja Navalnaha ŭ Rasiju z Hiermanii, i pik skłaŭ 550 tysiač čałaviek», — skazaŭ Pietčanik.
U apošni čas samaloty davoli časta traplajuć u naviny. Spačatku Kajli Dženier raskrykavali za toje, što jana ździejśniła 17-chvilinny pieralot, vykinuŭšy pry hetym 1 tonu vuhlakisłaha hazu ŭ atmaśfieru.
Paśla hetaha markietynhavaja kampanija Yard, jakaja zajmajecca pytańniami ŭstojlivaha raźvićcia, padrychtavała spravazdaču, u jakim pieraličyła znakamitaściaŭ, čyje pryvatnyja samaloty ździejśnili najbolšuju kolkaść palotaŭ u hetym hodzie, i adpaviednyja vykidy vuhlakisłaha hazu. Na pieršym miescy ŭ hetym śpisie apynułasia Tejłar Śvift, čyj samalot u hetym hodzie ździejśniŭ 170 palotaŭ i vykinuŭ 8294 tony vuhlakisłaha hazu, što prykładna ŭ 1185 razoŭ bolš, čym ahulny hadavy abjom vykidaŭ siaredniaha čałavieka.
Ciapier u tvitary jość akaŭnty, jakija adsočvajuć kankretnyja samaloty z dapamohaj bota, vykarystoŭvajučy ahulnadastupnyja danyja ADS-B. Heta @ElonJet, @CelebJets, @SportJets, @Corporate_Jets i @RUOligarchJets, jakija stvaryŭ Džek Suini, student druhoha kursa Univiersiteta Centralnaj Fłarydy.
Padobna na toje, što ŭsio bolš ludziej cikaviacca adsočvańniem samalotaŭ, asabliva tych, jakija naležać znakamitaściam, bo jany razumiejuć, nakolki škodnyja niekatoryja paloty — naprykład, dziesiacichvilinny palot Fłojda Mejvieziera ŭ Łas-Viehas. U tvitary ludzi aburajucca nie tolki tym, jak mocna znakamitaści adarvanyja ad «prostych» ludziej, ale i abmiarkoŭvajuć, jaki surjozny ŭron klimatu nanosić kožny palot.
