Barel: U Łukašenki niama nijakaj lehitymnaści
Jeŭrasajuz praciahvaje admaŭlać Alaksandru Łukašenku ŭ lehitymnaści. Pra heta havorycca ŭ zajavie viarchoŭnaha pradstaŭnika ES pa źniešnich spravach i palitycy biaśpieki Žazepa Barela z nahody druhoj hadaviny vybaraŭ 2020 hoda.
«U aŭtorak spaŭniajecca druhaja hadavina falsifikavanych prezidenckich vybaraŭ 9 žniŭnia 2020 hoda, jakija pazbavili biełarusaŭ mahčymaści svabodna vybirać svaju budučyniu. U hety dzień my znoŭ zajaŭlajem ab našaj ćviordaj padtrymcy ich demakratyčnych pamknieńniaŭ i namahańniaŭ pa abaronie asnoŭnych pravoŭ čałavieka. My paŭtarajem, što ŭ Alaksandra Łukašenki niama nijakaj demakratyčnaj lehitymnaści» — havorycca ŭ zajavie.
U im padkreślivajecca, što minski režym pačaŭ masavyja represii suprać biełaruskaha naroda za imknieńnie da demakratyčnaha kiravańnia. Z tych časoŭ represii tolki ŭzmacnialisia.
«Palityčnych źniavolenych — pravaabaroncaŭ, žurnalistaŭ, prafsajuznych dziejačaŭ, rabotnikaŭ ŚMI, jurystaŭ i prostych hramadzian, jakija vykazvajuć lubuju krytyku sistemy, — ciapier naličvajecca bolš za 1200 čałaviek, i hetaja ličba raście z kožnym dniom. Mnohija biełarusy, u tym liku pradstaŭniki demakratyčnaj apazicyi, byli vymušanyja pakinuć krainu, kab paźbiehnuć nieabhruntavanych pieraśledaŭ. Režym zaklajmiŭ mnohich demakratyčnych aktyvistaŭ «terarystami», padviarhajučy ich dezynfarmacyi i zapałochvańniu, a taksama pahražajučy im śmiarotnym pakarańniem. Jon taksama ŭzmacniŭ pieraśled polskaj abščyny», — adznačajecca ŭ zajavie.
Pa słovach Barela, nichto ź vinavatych u hvałcie suprać hramadzianskaha nasielnictva nie byŭ pryciahnuty da adkaznaści. Barel adznačyŭ, što Jeŭrasajuz praciahnie padtrymlivać namahańni pa pryciahnieńniu režymu da adkaznaści.
