«Usie daŭhi ja zabraŭ na dziaržavu!» Łukašenka zahadaŭ vyratavać Miorski mietałaprakatny zavod ad bankructva. Zavod u pryvatnikaŭ adabrali
Alaksandr Łukašenka siońnia naviedaŭ Miorski mietałaprakatny zavod. Na zavod pryznačany novy dyrektar, a samo pradpryjemstva abjavili dziaržaŭnym, paviedamiŭ łukašenkaŭski th-kanał.
«Idealnaje pradpryjemstva pieratvaryli ŭ bankruta. U nas takich pradpryjemstvaŭ niama. Heta supierpradpryjemstva. Tut prosta treba zakasać rukavy i vyrablać pradukcyju, zbyvać», — zajaviŭ siońnia Łukašenka.
Jon adznačyŭ, što nieabchodna ratavać ludziej. «Samy hałoŭny vynik majho naviedvańnia siońnia: my ŭžo damovilisia ab dvuch Hierojach Biełarusi, jakija vykanajuć daručanaje im i atrymajuć zorki hieroja. Hety zavod pavinien naradžać novych hierojaŭ dla Biełarusi», — dadaŭ jon.
Łukašenka zajaviŭ, što ŭžo pryznačyŭ dyrektara zavoda, a sam zavod pieratvorany ŭ dziaržaŭny.
«U vas zaraz jość paŭnapraŭny dyrektar. Ź siońniašniaha dnia vy pracujecie jak dziaržaŭnaje pradpryjemstva. Pryvatniki nie vykanali abaviazacielstvy, usie daŭhi ja zabraŭ na dziaržavu! Ciapier vy biełaruski zavod», — zajaviŭ Łukašenka.
Taksama Łukašenka skazaŭ, što na zavodzie nie chapaje 60 čałaviek, zahadaŭšy brać tudy studentaŭ z apošnich kursaŭ.
Sud ab pryznańni MMPZ bankrutam byŭ pryznačany na listapad. Ahulnaja zapazyčanaść pa kredytach składała 1,656 młrd rubloŭ.
Što adbyłosia?
Prablemy zavoda pačalisia z zatrymańnia jaho kiraŭnictva. Biznesmien Alaksiej Kavalonak i jaho partniory zapuścili Miorski mietałaprakatny zavod u 2020 hodzie. Inviestycyi skłali 200 młn jeŭra. U tym ža hodzie «MMPZ-hrup» zaklučyła sponsarski kantrakt z adnoj ź viadučych honačnych kamand «Formuły-1» McLaren, nahadvaje Zerkalo.io.
U pačatku leta 2021-ha na pradpryjemstva pavinien byŭ pryjechać Alaksandr Łukašenka. Ale hetaha nie zdaryłasia, zamiest jaho zavod naviedali siłaviki i zatrymali niekatorych kiraŭnikoŭ i rabotnikaŭ. Paźniej stała viadoma, što za kratami znachodziacca hiendyrektar zavoda Piotr Šymukovič, jaho namieśnik pa ekanomicy i finansach Dźmitryj Słaŭnikaŭ i kiraŭnik savieta dyrektaraŭ Alaksiej Kavalonak.
Pavodle źviestak KDB, ich abvinavacili pavodle č. 2 art. 424 KK (złoŭžyvańnie ŭładaj abo słužbovymi paŭnamoctvami), č. 6 art. 16 (saŭdzieł u złačynstvie) i č. 2 art. 243 (uchileńnie ad vypłaty padatkaŭ). Pa pieršym z hetych artykułaŭ prachodzili jašče piać čałaviek, jakich 20 červienia minułaha hoda vypuścili z-pad varty.
Paśla zatrymańnia čynoŭniki ŭzialisia «ratavać» pradpryjemstva, abvinavačvajučy ŭładalnikaŭ u tym, što za pieršy hod pracy zavod nie vyjšaŭ na prahnoznyja pakazčyki. Adnak rabotniki MMPZ raspaviadali, što prablemy pačalisia jak raz paśla zatrymańnia kiraŭnictva.
