Kanadskaja Nutrien ličyć, što ekspart biełaruskaha kaliju za paŭhoda ŭpaŭ udvaja
Kanadskaja kampanija Nutrien, jakaja źjaŭlajecca adnym z najbujniejšych vytvorcaŭ minieralnych uhnajeńniaŭ, u svajoj paŭhadavoj spravazdačy acaniła źnižeńnie ekspartu kalijnych uhnajeńniaŭ ź Biełarusi i Rasii, piša Reform.by.
Pa jaje danych, adhruzki z Rasii ŭ pieršym paŭhodździ skaracilisia prykładna na 25%, a ź Biełarusi — na 50%. Pry hetym vialikaja častka biełaruskaha ekspartu ŭhnajeńniaŭ pryjšłasia na pieršy kvartał hetaha hoda.
«Abmiežavanyja pastaŭki kaliju z Rasii i Biełarusi ŭtrymlivali ceny na kalij na histaryčna vysokim uzroŭni na praciahu pieršaj pałovy 2022 hoda. Pavodle acenak, pastaŭki kaliju z Rasii i Biełarusi ŭ pieršaj pałovie 2022 hoda skaracilisia prykładna na 25 i 50 adsotkaŭ adpaviedna», — havorycca ŭ spravazdačy kampanii.
Ź leta minułaha hoda Biełstat nie publikuje źviestki ab eksparcie kalijnych uhnajeńniaŭ ź Biełarusi.
Abmiežavańnie pastavak ź Biełarusi i Rasii vymusiła kampaniju zvuzić dyjapazon prahnozu zbytu kaliju ŭ 2022 hodzie da 61-64 młn t.
Taksama ŭ spravazdačy adznačajecca składanaja situacyja na rynku azotnych uhnajeńniaŭ.
«Rezki rost cen na pryrodny haz u Jeŭropie znoŭ pryvioŭ da źnižeńnia abjomaŭ vytvorčaści azotu ŭ rehijonie. Skaračeńnie pastavak amijaku ŭ Jeŭropu i značnaje skaračeńnie rasijskaha ekspartu amijaku z Čornaha mora akazvajuć cisk na hłabalnuju dastupnaść amijaku. My čakajem vysokaha siezonnaha popytu na azot u druhoj pałovie 2022 hoda paśla pieryjadu adkładzienych zakupak z-za vałacilnaści bazavych koštaŭ», — adznačyli ŭ kampanii.