70-hadovamu žycharu Niaśviža pahražaje vialiki termin źniavoleńnia za ŭdzieł u pratestach
U sudzie Leninskaha suda Hrodna razhladajecca kryminalnaja sprava Vasila Dziemidoviča.
Jaho abvinavačvajuć adrazu pa niekalkich artykułach Kryminalnaha kodeksa: art. 369 — abraza pradstaŭnika ŭłady, art. 391 — abraza sudździ albo narodnaha zasiadaciela ŭ suviazi z ažyćciaŭleńniem im pravasudździa, č. 1 art. 368 — publičnaja abraza Łukašenki i č. 1 art. 293 — padrychtoŭka da arhanizacyi masavych biesparadkaŭ, jakija supravadžajucca hvałtam nad asobaj, pahromami, padpałami, źniščeńniem majomaści, uzbrojenym supracivam pradstaŭnikam ułady, paviedamlaje «Viasna».
Spravu razhladaje sudździa Juryj Kazakievič.
Pa danych śledstva, Vasil Dziemidovič ź vieraśnia 2021 hoda pa studzień 2022 hoda raźmiaščaŭ u destruktyŭnych Telegram-kanałach paviedamleńni z abrazami pradstaŭnikoŭ ułady, u tym liku vyšejšych słužbovych asob. Taksama jon vykazvaŭ pahrozy prymianieńnia hvałtu ŭ dačynieńni da supracoŭnikaŭ pravaachoŭnaj i sudovaj sistem, pry hetym publična źnievažajučy ich honar i hodnaść.
Paviedamlajecca pra 60 faktaŭ złačynnaj dziejnaści.
Taksama śledstva śćviardžaje, što mužčyna «zaklikaŭ hramadzian da dziejańniaŭ, nakiravanych na arhanizacyju masavych biesparadkaŭ, jakija supravadžajucca pahromami, padpałami, źniščeńniem administracyjnych budynkaŭ. U ekstremisckich telehram-kanałach jon šukaŭ ludziej, hatovych ździajśniać złačynstvy, adnak nie davioŭ svoj namier da kanca, pakolki byŭ zatrymany supracoŭnikami pravaachoŭnych orhanaŭ».
Cudovy praces raspačaŭsia 2 žniŭnia.
Padčas dopytu abvinavačany raspavioŭ, što raskajvajecca i škaduje pra zroblenaje. Taksama dadaŭ, što va ŭsim vinavatyja emocyi, jakim jon paddaŭsia, pavieryŭšy infarmacyi, raźmieščanaj na «destruktyŭnych resursach».
Viadoma taksama, što Vasil Dziemidovič raniej pryciahvaŭsia da administracyjnaj adkaznaści za ŭdzieł u akcyjach pratestu.
