Za adno fota rasijskaj vajskovaj techniki ajci-śpiecyjalistu dali dva hady kałonii
Homielski abłasny sud 1 žniŭnia vynies prysud 30-hadovamu IT-śpiecyjalistu Andreju Utkinu. Jaho abvinavačvali ŭ pieradačy fota pieramiaščeńnia rasijskaj techniki TH-kanału «Biełaruski Hajun» (č. 1 art. 361-4 Kryminalnaha kodeksa — «Sadziejničańnie ekstremisckaj dziejnaści»).
U praŭładnych telehram-kanałach paviedamlałasia, što mužčyna sfatahrafavaŭ kałonu rasijskaj vajskovaj techniki, a mienavita — vajskovyja KAMAZy ź litaraj V, i adpraviŭ fota ŭ telehram-kanał «Biełaruski Hajun», paviedamlaje «Viasna».
Andreja zatrymali 31 sakavika i da suda źmiaścili ŭ SIZA №3 Homiela.
U pieršy dzień sudovaha pasiadžeńnia, 26 lipienia, sudździa Rusłan Caruk zapytaŭsia ŭ Utkina, čamu toj fatahrafiju adpraviŭ u «Biełaruski Hajun», a nie ŭ «SB. Biełaruś siehodnia» ci ANT.
«Kali jechaŭ pa horadzie, ździviŭsia, ubačyŭšy «KAMAZ» ź litaraj V pobač z płoščaj Lenina. Tamu vyrašyŭ zrabić fota i adpravić jaho ŭ telehram-kanał. Prykładna praz dva tydni ja byŭ zatrymany supracoŭnikami HUBAZiK u siabie doma. Ja byŭ mocna šakavany, nie viedaŭ, što za fatahrafiju praduhledžanaja kryminalnaja adkaznaść», — tłumačyŭ jon u «pakajannym» videa.
Prakuror paprasiŭ sud pryznać Andreja Utkina vinavatym i pakarać pazbaŭleńniem voli terminam na dva hady ŭ kałonii ahulnaha režymu.
Siońnia sud pastanaviŭ pryznać Utkina vinavatym i prysudziŭ jamu pazbaŭleńnie voli ŭ kałonii ahulnaha režymu terminam na dva hady. Mienavita stolki i prasiła abvinavačańnie.
