«Intelihientny technakrat». Biznes i čynoŭniki tłumačać «Našaj Nivie», što aznačaje pryznačeńnie Jermałoviča
Były pasoł Biełarusi ŭ Vialikabrytanii, a ŭ minułym ministr finansaŭ Maksim Jermałovič pryznačany namieśnikam kiraŭnika Administracyi Łukašenki. Finansist-prafiesijanał, na pasadzie ministra jon zasłužyŭ reputacyju niaśmiełaha, ale rynačnika. U 2020 ža hodzie i paśla jon išoŭ stroha ŭ farvatary aficyjnaha kursu. Što aznačaje jaho pryznačeńnie ŭ Administracyju?
Pryznačeńnie Maksima Jermałoviča vyklikała pazityŭnyja čakańni ŭ biznesu i kiraŭnikoŭ dziaržpradpryjemstvaŭ. «Jermałovič razumieje toje, što jamu kažuć», — skazaŭ «Našaj Nivie» adzin z top-mieniedžaraŭ. Jaho ŭsprymajuć jak čałavieka, što ŭmieje słuchać, usprymać arhumienty i sychodzić z realij, a nie ź ideałahičnych ustanovak.
«Jermałovič u pieršuju čarhu prafiesijanał. Jon i ministram finansaŭ byŭ tałkovy, a ciapier atrymaje ŭładu i, jak minimum, ja dumaju, u biznesa budzie da kaho schadzić sa skarhami i prapanovami. Bo Jermałovič heta čałaviek, jakomu možna niešta tłumačyć, jaki razumieje toje, što jamu kažuć, u adroźnieńnie ad mnohich inšych jaho papiarednikaŭ, ź jakimi havoryš — jak sa ścianoj», — kaža adzin ź mieniedžaraŭ bujnoha dziaržaŭnaha pradpryjemstva.
«Ja z hetym pahadžusia, pa prafiesijnych jakaściach u dačynieńni da fiskalnaj funkcyi ŭrada jon mocna vyłučaŭsia na fonie astatnich, davoli hruntoŭny i mietadyčny tavaryš, — kaža nam były kaleha Jermałoviča. — Da hetaha jašče dadavałasia intelihientnaść u pavodzinach. Ën vyhladaŭ takim intelihientnym technakratam. Usie, chto vieryŭ u šlach łukašenkaŭskaj libieralizacyi, razhladali jaho jak adnaho ź simvałaŭ hetaj libieralizacyi, — kaža čałaviek. —
Prychilniki hetaha šlachu i ramantyčna-naiŭnaja publika ŭ 2018—2020 hadach lubili prasoŭvać miem pra ŭrad Rumasa jak dream-team i Jermałoviča jak adnu z hałoŭnych zorak hetaj dream-team».
Siarod hałoŭnych zasłuh Jermałoviča nazyvajuć toje, što jon sumieŭ «asučaśnić» Ministerstva finansaŭ — jak piersanalny skład, tak i mietady funkcyjanavańnia.
Taksama ŭ jahonym słužbovym śpisie — padvyšeńnie jakaści funkcyjanavańnia sistemy dziaržfinansaŭ. Jaho ŭniosak u adpaviednyja stratehii, pryniatyja z 2015 pa 2020 hady, jak i ŭ ich realizacyju, davoli značny.
«Zhulaŭ istotnuju rolu padčas kryzisu 2015—2016 hadoŭ, davioŭ biudžet da ładu: urezaŭ niekrytyčnyja vydatki, uziaŭ pad kantrol i ŭtajmavaŭ vydatki na dziaržpradpryjemstvach, damohsia dyviersifikacyi finansavańnia dziarždoŭhu», — kaža rabotnik Saŭmina časoŭ Jermałoviča.
Pry im naziraŭsia peŭny prahres u raźvićci fondavaha rynku i paśpiachova byli raźmieščanyja jeŭrabondy.
«Ale ŭsie hetyja zasłuhi davoli chistkija i vielmi zaležać ad interpretacyi i staŭleńnia da kancepcyi pavolnaj libieralizacyi 2015—2020 hadoŭ. Chtości skaža, što heta istotnyja kroki napierad (i z hetym možna pahadzicca). Chtości skaža, što heta tolki niaznačnaja i nieistotnaja častka taho, što treba było zrabić, bo adstavańnie ad sučasnych praktyk usio roŭna zastavałasia značnym.
Maŭlaŭ, źmianiaŭsia tolki fasad i heta amal nijak nie paŭpłyvała na sutnaść biełaruskaj ekanamičnaj madeli. Tamu hetyja ž zasłuhi ŭ niedachopy možna pieriekvalifikavać», — ličyć inšy kaleha Jermałoviča.
«Jermałovič i taja kamanda pavyšali efiektyŭnaść sistemy, nie mianiajučy jaje sutnaści», — kaža čałaviek, jaki schilny ŭsprymać dziejnaść eks-ministra krytyčna.
«Zasłuha i Jermałoviča, i inšych ludziej, i kamandy Nacbanka-Minfina-Minekanomiki ŭ tym, što ŭ Biełarusi dasiahnuta makraekanamičnaja stabilnaść, jakoj u nas nikoli dahetul nie było. Z udziełam Jermałoviča z 2011 hoda Biełarusi ŭdałosia amal na 10% skaracić dolu vydatkaŭ biudžetu adnosna VUP, što było niedasiahalnaj metaj, naprykład, dla hrekaŭ», — kazaŭ u 2018 hodzie «Našaj Nivie» pra Jermałoviča ekanamist Alaksandr Čubryk.
Siarod sprečnych vynikaŭ pracy Jermałoviča — restrukturyzacyja daŭhoŭ dziaržkampanij.
«Samaja supiarečlivaja reč, źviazanaja ź Jermałovičam, heta restrukturyzacyja daŭhoŭ dziaržkampanij (drevaapracoŭka, mašynabudavańnie, cemient dy inšaje). Šmat chto ličyć, što mienavita jon hałoŭny aŭtar hetaha miechanizma, kali daŭhi (pieravažna nazapašanyja ŭ pieryjad tak zvanaj madernizacyi) i adpaviednyja ryzyki pradpryjemstvaŭ biare na siabie dziaržava, kab paźbiehnuć bankructvaŭ pradpryjemstvaŭ i bankaŭ, — kaža adzin z ekanamistaŭ.
— Tut mahčymyja interpretacyi ad «heta dazvoliła paźbiehnuć maštabnych daŭhavych kryzisaŭ u 2015—2016 i 2020» da dyjamietralna supraćlehłaha — «hetaja schiema zamaroziła daŭhavuju prablemu, maštabujučy i raspaŭsiudžvajučy daŭhavyja ryzyki pa ŭsiej ekanomicy», — kaža ekanamist.
Łukašenka razahnaŭ Rumasavu kamandu libierałaŭ pierad vybarami. Niekatoryja kalehi tady papikali Jermałoviča, što jon pahadziŭsia na pasadu pasła i pajšoŭ pracavać pradstaŭnikom režymu za miažoj.
«U vačach mnohich čałaviek faktyčna straciŭ reputacyju i imidž technakrata, pramianiaŭšy ich na pazicyju z palityčnym adcieńniem. 2020 hod jaho papiaredni «bahaž» abnuliŭ», — kaža kaleha Jermałoviča.
Z hledzišča ž sistemy pryznačeńnie Jermałoviča ŭ Łondan mieła jasny sens i łohiku.
«Jermałovič u Saŭminie ščylna pracavaŭ z namieśnikam ministra zamiežnych spraŭ Alaksandram Michnievičam — jany zajmalisia supracoŭnictvam ź mižnarodnymi finansavymi ŭstanovami. I pryznačeńnie ŭ Łondan absalutna łahičnaje, bo heta finansavaja stalica śvietu. I hałoŭny ofis Jeŭrapiejskaha banka rekanstrukcyi i raźvićcia tam, darečy.
Paśla Alejnika (jakoha pavažali) na miesca ŭ Łondan šukali čałavieka, jaki b nie tolki nie zrabiŭ horš, ale i palepšyŭ rabotu jak finansist. Heta było łahičnaje pryznačeńnie, Jermałovič — kvalifikavany finansist. Pavažali jaho nie mienš za Alejnika tam, ale pracuje jon na takuju sistemu, jakaja ŭsie jaho starańni nivieluje, što ž zrobiš, navat škada jaho trochu», — kaža jašče adzin čałaviek, znajomy ź Jermałovičam.
I tym nie mienš, pryznačeńnie kahości takoha, jak Jermałovič, u Administracyju prymušaje zadumacca. Čamu jon i čamu ciapier?
Treba adznačyć, što Jermałovič uvachodziŭ badaj što va ŭsie pieramoŭnyja hrupy pa mižnarodnych linijach. U pryvatnaści, jon byŭ adnym ź pieramoŭščykaŭ z MVF. Kali b ułady šukali čałavieka, zdolnaha havaryć i słuchać, to Jermałovič idealna na takoha čałavieka nadajecca.
Jermałoviču 45 hadoŭ, jon rodam ź Lepiela. Skončyŭ Połacki dziaržaŭny univiersitet i Akademiju kiravańnia. Pracavaŭ u padatkovaj śfiery, a z 2002-ha pierajšoŭ u Ministerstva finansaŭ. Pasadu ministra finansaŭ jon zaniaŭ u 2018 hodzie. A praz dva hady pajechaŭ pasłom u Vialikabrytaniju.
Sa sportu cikavicca tenisam i skvošam. Ale va ŭradzie słyŭ nie svaimi chobi, a pracahalizmam, jaki ŭvajšoŭ u lehiendu.
Adnaho z surazmoŭcaŭ «Našaj Nivy» vielmi ŭraziła toje, što paśla adnaho z Kastryčnickich ekanamičnych forumaŭ jany razam ź Jermałovičam išli dadomu ŭ rajonie 22 hadzin, ale akazałasia, što Jermałovič jedzie nie dadomu, a na rabotu — darablać spravy.
Viadoma, što Jermałovič pozna, tolki pry kancy 2020-ha žaniŭsia, nie maje nieruchomaści ŭ Drazdach i, prynamsi da svajho pryznačeńnia pasłom, žyŭ u minskim panelnym mikrarajonie Sucharava.
Źviazacca z aŭtaram i dapoŭnić temu možna naŭprost u telehramie @artsiom_harbatsevich abo praz mejł [email protected]
