Pastaŭleny novy antyrekord pa kolkaści zaniatych u biełaruskaj ekanomicy
U červieni hetaha hoda ŭ ekanomicy było zaniata 4 młn 207 tys. čałaviek, paviedamlaje Biełstat. Ciapierašni pakazčyk — novy histaryčny minimum pa kolkaści zaniataha ŭ ekanomicy nasielnictva, adznačaje «Ekonomičieskaja hazieta».
U mai zaniatych u ekanomicy było bolš — 4 młn 212,8 tys. čałaviek. Atrymlivajecca, što tolki za miesiac Biełaruś pazbaviłasia 5,8 tys. rabotnikaŭ.
Skaračeńnie zaniataści praciahvajecca z sakavika. I ekanamisty bačać try asnoŭnyja faktary, jakija na heta ŭpłyvajuć:
1. Demahrafičnaja prablema — źmianšeńnie kolkaści hramadzian pracazdolnaha ŭzrostu, jakoje ŭ 2017—2022 hadach zapavolvałasia pavyšeńniem piensijnaha ŭzrostu, ale paskarałasia kavid-pandemijaj.
2. Ekanamičnyja prablemy, jakija nie dazvalajuć pracaŭładkavacca na prymalnych dla hramadzian umovach, z hodnym zarobkam, a najmalnikam — dać hramadzianam takija ŭmovy.
3. Pracoŭnaja emihracyja jak adkaz na paharšeńnie ekanamičnych umoŭ i emihracyja pa sacyjalnych i palityčnych pryčynach, a ciapier užo i z-za rezkaha ŭzmacnieńnia sankcyj, što pierakreśliła nadziei mnohich na lepšyja časy.
I kali ekanamičny i sacyjalna-palityčny faktary emihracyi časovyja (ludzi viernucca), to faktar straty nadziej na chutkija pazityŭnyja pieramieny, da taho ž ź pierśpiektyvaj novaj «žaleznaj zasłony» źjaŭlajecca samym niehatyŭnym. Z-za hetaha krainu nazaŭždy pakidajuć najbolš aktyŭnyja i ambicyjnyja maładyja ludzi, adznačaje «Ekonomičieskaja hazieta».
