Maryna Adamovič: Statkievič adrazu napisaŭ zajavu na adzinočnaje ŭtrymańnie
Palitviazień Mikałaj Statkievič paśla ŭstupleńnia ŭ siłu rašeńnia suda pieraviedzieny ŭ papraŭčuju kałoniju asablivaha režymu №13 u Hłybokim. Pra toje, jakija ŭ jaho tam umovy, raskazała ŭ intervju «Radyjo Racyja» žonka Statkieviča Maryna Adamovič.
«Nasamreč, ja viedaju nie vielmi šmat, choć i atrymała ad jaho dva listy. 20 červienia Mikałaja razam ź Iharam Łosikam i Źmitrom Papovym etapavali z homielskaha SIZA.
Dla kahości było pytańniem, kudy. Ale ja niejkich sumnievaŭ nie mieła — etapavali ŭ Hłybokaje. Bo Hłybokaje — heta adzinaja kałonija ŭ Biełarusi, dzie ŭtrymlivajucca asudžanyja da asablivaha režymu: pažyćciovaha ŭtrymańnia, ci śmiarotnaje pakarańnie zamienienaje na pažyćciovaje źniavoleńnie, heta vielmi śpiecyfičnaje miesca.
24 červienia jon tudy pryjechaŭ, časova jaho zatrymlivali ŭ Viciebskim SIZA. Ale jak vynikaje ź listoŭ, užo prynamsi z 24-ha jon znachodzicca ŭ karancinie hłybockaj kałonii.
Mikoła adrazu napisaŭ zajavu na adzinočnaje ŭtrymańnie z suviazi z pahrozami ad administracyi i supracoŭnikaŭ. Heta dastatkova zvyčajny padychod, bo jon maje ŭžo vialiki žyćciovy dośvied taho, što ź im vypadkovyja ludzi nikoli nie siadziać, i što najaŭnaść hetych vypadkovych ludziej stvaraje nie tolki pahrozu (bo hetyja ludzi znachodziacca pad poŭnym kantrolem administracyi), ale jany jašče pišuć zajavy pra toje, što Mikoła pryznavaŭsia im u niejkich tym złačynstvach. U apošnim liście darečy jon zhadaŭ, što adzin ź jaho minułych sukamiernikaŭ napisaŭ zajavu, što Mikoła pryznaŭsia jamu, što niby ŭtvaryŭ niejkaje złačynstva.
Mikałaj zrabiŭ vielmi ciažki vybar, i dla mianie ciažka siabie ŭjavić — čałaviek, jaki ŭžo dva hady znachodzicca adzin, navažvajecca takim rašučym sposabam praciahvać svoj ułasny supraciŭ. Prynamsi jašče na praciahu minimum troch hod.
Bo asablivy režym — heta takaja schavanaja turma.
Asablivy režym praduhledžvaje na praciahu nie mienš, čym traciny terminu, kamiernaje ŭtrymańnie. To-bok toje samaje, što jany mieli ŭ SIZA, tolki bieź pieradačak, biez dvuch asobnych špacyraŭ, i hetak dalej. Jamu zastałosia jašče jak minimum try hady.
Tradycyjna, u pieršy ž dzień jaho pastavili na ŭlik, jak schilnaha da ekstremizmu.
I jašče adna admietnaść kałonii asablivaha režymu, da jakoj Mikałaj pastaviŭsia ź jamu charakternym humaram, — heta pałasataja roba. Takaja, jakaja ŭ nas vyklikaje asacyjacyi ź dziciačymi multfilmami pra Čypalina».
