Va Ukrainie addali na patreby abaroncaŭ krainy samalot i viertalot kuma Pucina
Ukrainskija pravaachoŭniki addali na patreby USU viertalot i samalot, jakija byli va ŭłasnaści padazravanaha ŭ dziaržaŭnaj zdradzie narodnaha deputata Viktara Miedźviedčuka.
Paviedamlajecca, što «pa chadajnictvie Ofisa hienieralnaha prakurora sudom nakładzieny aryšt na viertalot i samalot, jakim karystałasia siamja narodnaha deputata Ukrainy, jaki padazrajecca ŭ dziaržaŭnaj zdradzie. Ciapier pravaachoŭniki kanfiskavali hetuju majomaść i pieradali ŭ karystańnie Uzbrojenym siłam Ukrainy».
Miedźviadčuk — kum Uładzimira Pucina, adzin z hałoŭnych prarasijskich palitykaŭ Ukrainy. U lutym jon uciok z-pad chatniaha aryštu, pad jaki jaho źmiaścili ŭ 2021 hodzie. 12 krasavika było paviedamlena, što jon zatrymany.
Pa viersii śledstva, Miedźviadčuk dapamahaŭ Rasii ŭ viadzieńni infarmacyjnaj vajny suprać Ukrainy i kansultavaŭ pa raspaŭsiudžvańni siarod ukraincaŭ rasijskich naratyvaŭ.
Taksama śledčyja orhany padazrajuć, što Miedźviadčuk pieradaŭ Rasii infarmacyju ab raźmiaščeńni sakretnaha padraździaleńnia Minabarony Ukrainy.
Akramia taho, śledstva vyjaviła, što abvinavačany deputat na praciahu 2015—2020 hadoŭ dapamahaŭ pradstaŭnikam krainy-ahresara ŭ praviadzieńni padryŭnoj dziejnaści suprać Ukrainy. A ŭ 2015 hodzie, pa źviestkach prakuroraŭ, Miedźviadčuk spryjaŭ RF u rabavańni nacyjanalnych kaštoŭnaściaŭ u Krymie: jon pieradaŭ źviestki i dakumienty dla niezakonnaj zdabyčy nafty i hazu na Prykierčanskim šelfie Čornaha mora ŭ vyklučnaj (marskoj) ekanamičnaj zonie Ukrainy. Resursy hetaha radovišča kaštujuć bolš za 38 miljardaŭ hryŭniaŭ.
Abvinavaŭčy akt suprać narodnaha deputata na pačatku červienia nakiravali ŭ sud. Jamu pahražaje da 15 hadoŭ pazbaŭleńnia voli z mahčymaj kanfiskacyjaj majomaści.
