«Hetaja vajna nie moža skončycca narmalnym čynam, tamu što meta hetaj vajny — vajna»
Najhoršy typ vojnaŭ — heta tyja vojny, jakija źjaŭlajucca samametaj. Ich niemahčyma skončyć dasiahnieńniem niejkaha kankretnaha vyniku, tamu što meta — jak haryzont, pastajanna adsoŭvajecca pa miery nabližeńnia. Dla Kramla vajna — nie instrumient, a toj idealny stan hramadstva, jaki kirujučamu kłasu Rasii chaciełasia b zafiksavać jak kanstantu. Takoje mierkavańnie vykazaŭ palitołah Uładzimir Pastuchoŭ na «Svabodzie».
Uładzimir Pastuchoŭ kaža, što vajna, vidavočna, pieršapačatkova pajšła nie tak, jak płanavaŭ Kreml. I kali ŭ pieršy miesiac vajny kramloŭskaje kiraŭnictva znachodziłasia ŭ stanie, što byŭ u Stalina ŭ pieršyja 10-15 dzion vajny, to dalej usio pierabudavałasia na ruski ład, jaki palahaje ŭ tym, što «žyćcio — piatak, masaj zadušym», «baby jašče naradžajuć», resursaŭ chopić, my ich pieražyviom.
Na PMF Pucin užo vyjšaŭ z kancepcyjaj viečnaj vajny, miarkuje Pastuchoŭ.
U čym kančatkovyja mety Rasii?
— Ciažar hetaj vajny składajecca ŭ tym, što heta vajna biez mety, u Rasii ŭ hetaj vajnie niama metaŭ, i tamu vajna nie moža skončycca narmalnym čynam, tamu što meta hetaj vajny — vajna, — kaža Pastuchoŭ.
Palitołah miarkuje, što ŭ toj častki kiraŭnictva Rasii, jakaja całkam racyjanalnaja, i jakuju nazyvajuć technakratyčnaj, skłałasia kancepcyja vyžyvańnia Rasii, sens jakoj zaklučajecca ŭ tym, što vajna zjaŭlajecca narmalnym zdarovym i karysnym stanam dla Rasii. I hetuju vajnu treba pastajanna padtrymlivać, jak pavolny ahoń.
— Možna hatavać na mocnym ahni, a jość takija bulony, jakija treba kipiacić hadzinami na maleńkim ahni.
Dyk voś ciapier dla ich vajna — heta taki maleńki ahoń, na jaki jany chočuć pastavić Rasiju i pierakipiacić jaje, kab atrymać u vyniku praz 25 hadoŭ absalutna inšy, patrebny im bulon. Na što jany raźličvajuć? Jany raźličvajuć na toje, što pakul jany buduć hareć na maleńkim ahni, voś taja samaja Jeŭropa zharyć u ahni i «patrapić u piekła».
Jakaja stratehija Zachadu?
Nijakaj adzinaj stratehii ŭ Zachadu niama, ličyć palitołah.
— Jeŭropa pakul znachodzicca ŭ pracesie ŭśviedamleńnia taho, u jakoje niepryjemnaje miesiva jana ŭlapałasia. Paśla 1991 hoda, kali adbyŭsia «adliŭ Rasii ź Jeŭropy», usie vyrašyli, što Rasija pierastała isnavać jak jeŭrapiejski hulec. A ciapier jana raptam vyskačyła jak čort z tabakierki, pryčym u samym niepryjemnym vyhladzie. Takoje ŭražańnie, što dvuchsot apošnich hadoŭ nie było, i voś jon Arakčejeŭ razam z Alaksandram i svaim «Śviaŝiennym sojuzom» pre na ŭsiu moc, prapisvaje hetaj Jeŭropie svoj «Śviaŝiennyj sojuz» u jakaści lekaŭ, — kaža jon.
Pa słovach Pastuchova, u Jeŭropie jość roznyja kancepcyi, jakija pradyktavanyja roznymi ŭnutrypalityčnymi situacyjami.
— Jość Borys Džonsan (i nie treba jaho zapichvać u adzin košyk z Džo Bajdenam, tamu što jon nie zalezie ŭ adzin košyk z Bajdenam), u jakoha takaja ŭnutrypalityčnaja situacyja, što lubaja vajna ŭ Jeŭropie dla jaho radaść i vyratavańnie. Bo ŭ jaho jość taki tearetyčny kanstrukt, što ciapier dobra, kab tam iskryła viečnaja Kurskaja duha daŭžynioj u niekalki tysiač kiłamietraŭ.
Pa-pieršaje, dźvižucha, usie zaniatyja.
Pa-druhoje, dobraja nahoda Brytanii, niahledziačy na «brekzit», viarnucca ŭ Jeŭropu i hulać tam svaju rolu.
Pa-treciaje, całkam razumny pohlad na toje, što stratehična heta vajna na spalvańnie apošnich rasijskich resursaŭ, kali nie dojdzie da abmienu jadziernymi ŭdarami.
Na dumku Pastuchova, apošniaja stratehija — łahična bolš zakončanaja, čym stratehija miratvorcaŭ, tamu što ŭ hetaj stratehii nie treba ŭličvać dumki druhoha boku.
— Rasija svajo słova skazała, jana ŭžo ŭlapałasia ŭ hetuju vajnu. Dalej treba razumna trymać jaje ŭvieś čas na adlehłaści vyciahnutaj ruki, kab jana nie saskočyła z hetaha kručka vajny, ale ŭ hałavu joj nie stuknuła sapraŭdy bambanuć pa Łondanie jadziernymi rakietami. Dla hetaha jana pavinna razumieć, što jak tolki niejkaja jadziernaja rakieta vylecić z Rasii, to nasamreč, biez usialakich žartaŭ, dziesiać palaciać u bok Kramla. Kali Kreml nie budzie hetaha viedać, jon budzie rabić usio što zaŭhodna, kolki moža.
Na dumku Pastuchova, ćviordaść pazicyi zachodnich krain — adzinaje, što moža strymlivać Rasiju.
— Kali jany adčuvajuć, što tam blef, hulajuć u pokier, dyk ciapier u Kramli samaja lepšaja ŭ śviecie kamanda pa hulni ŭ pokier. Hulać ź imi ŭ pokier biessensoŭna, jany pierajhrajuć. Možna tolki ćviorda pryniać dla siabie pastanovu dać im sihnał, što dalej hetaha punktu — rakiety ŭźlatajuć i laciać u bok Rasii.
Pastuchoŭ upeŭnieny, što Rasija nie budzie hatovaja ni da jakich pieramovaŭ, pakul nie ŭprecca mienavita ŭ hetuju akaličnaść.
Jaki dalejšy najbolš vierahodny scenaryj vajny?
Uładzimir Pastuchoŭ čakaje abvastreńnia situacyi ŭ lipieni-žniŭni, na pačatku vosieni. Rasija ŭprecca ŭ stvorany ešałon abarony Ukrainy na Danbasie.
— Dalej na hetaj kropcy pačniecca časovaje badańnie, i treba budzie niejkim čynam stymulavać situacyju. Ja čakaju, što jaje buduć stymulavać sprobaj arhanizavać cisk užo ŭ niejkaj inšaj kropcy [Ukrainy], zafiksavaŭšy front na Danbasie i pierakinuŭšy resursy ŭ inšaje miesca.
Pastuchoŭ miarkuje, što da hetaha inšaha miesca «padklučać» Biełaruś («u jakaści novaj krynicy miasa»).
