Kalininhrad moža stać Uładzibałtyjskam
Kiraŭnik rasijskaj partyi «Spraviadlivaja Rasija» Siarhiej Mironaŭ prapanavaŭ pierajmienavać Kalininhrad va Uładzibałtyjsk, a Kalininhradskuju vobłaść zrabić Bałtyjskim krajem.
Kalininhrad — horad, dzie zachavałasia pruskaja architektura
Ideju zrabić Kalininhradskuju vobłaść krajem Mironaŭ arhumientuje tym, što jana maje stratehičnaje značeńnie dla Rasii, a pierajmienavać Kalininhrad, na jahonuju dumku, treba «ŭ adpaviednaści z sučasnymi realijami i ajčynnymi tradycyjami».
Z nazvy Uładzibałtyjsk (vidać, pa suhučnaści z Uładzivastokam), pavodle Mironava, «stanovicca jasna, što havorka idzie pra farpost na krajniaj zachodniaj miažy našaj Radzimy, jakaja praciahnułasia ad Cichaha akijana da Bałtyki», — napisaŭ Mironaŭ u svaim telehram-kanale.
Kalininhradskaja vobłaść Rasii — častka byłoj Uschodniaj Prusii ŭ składzie Hiermanii. Da Druhoj suśvietnaj vajny jana mieła pieravažna niamieckaje nasielnictva i naležała da «niamieckaha śvietu» stahodździami. Da SSSR terytoryja adyšła pavodle Patsdamskaj damovy 1945 hoda i była dałučanaja da RSFSR. Niamieckaje nasielnictva było adtul całkam vysielenaje, zamiest jaho pryjechali pierasialency z Rasii i inšych sajuznych respublik SSSR.
Paśla raspadu SSSR hety rehijon akazaŭsia rasijskim ekskłavam, to-bok terytoryjaj, jakaja nie maje suchaputnaj miažy z astatniaj častkaj krainy. Z-za hetaha Kalininhradskaja vobłaść patencyjna moža być zabłakavanaja, niebiaśpieka čaho abvastryłasia apošnim časam, u suviazi z nakładańniem na Rasiju zachodnich sankcyj, jakija zakranajuć u tym liku i pytańnie kalininhradskaha tranzitu.
