Ułady Uźbiekistana zatrymali «arhanizataraŭ» pratestaŭ i zapadozryli źniešniaje umiašańnie ŭ Karakałpakstanie
U Respublicy Karakałpakstan (aŭtanomija na paŭnočnym zachadzie Uźbiekistana) siłaviki zatrymali hrupu arhanizataraŭ masavych akcyj. Ich abvinavacili ŭ sprobie zachapić orhany ŭłady rehijonu. Heta vynikaje z sumiesnaj zajavy parłamienta, urada i MUS Karakałpakstana, piša Interfaks.
Paviedamlajecca, što «złačynnaja hrupa asob arhanizavała supraćzakonnyja dziejańni, z metaj zachopu orhanaŭ dziaržaŭnaha kiravańnia Karakałpakstana».
Va ŭładaŭ Respubliki «vyklikajuć zaniepakojenaść sproby asobnych niezdarovych źniešnich sił z-za miažy paŭpłyvać na raźvićcio situacyi ŭ Karakałpakstanie, u tym liku šlacham metanakiravanych infarmacyjnych ukidaŭ i skažeńnia padziej, jakija adbyvajucca».
U piatnicu, 1 lipienia, pratesty prajšli ŭ Nukusie (stalica Karakałpakstana) z-za papravak u Kanstytucyju krainy.
Pa danych pres-słužby MUS Uźbiekistana, «z metaj niedapuščeńnia parušeńnia hramadskaha paradku i spynieńnia ździajśnieńnia hramadzianami roznych pravaparušeńniaŭ, byli zadziejničany siły i srodki pravaachoŭčych orhanaŭ».
Prajekt zakona «Ab uniasieńni źmianieńniaŭ i dapaŭnieńniaŭ u Kanstytucyju Respubliki Uźbiekistan» byŭ apublikavany 25 červienia dla ŭsienarodnaha abmierkavańnia.
U adpaviednaści z rašeńniem parłamienta, abmierkavańnie prajekta praciahniecca da 5 lipienia, zatym jaho vyniesuć na refierendum.
Prajekt zakona praduhledžvaje bolš za 200 źmianieńniaŭ u 64 artykuły Kanstytucyi.
Siarod ich ‒ punkt ab padaŭžeńni terminu paŭnamoctvaŭ prezidenta Uźbiekistana ź piaci da siami hadoŭ. Kanstytucyjnaja reforma taksama likviduje šyrokuju aŭtanomiju Karakałpakstana.
