Dakładčyca AAN: Biełaruś patanaje ŭ atmaśfiery strachu i samavolstva
Pra sistemnyja parušeńni pravoŭ čałavieka ŭ Biełarusi i biespakaranaść za heta ŭ Radzie pa pravach čałavieka AAN zajaviła Anais Maren, śpiecdakładčyk AAN pa Biełarusi, padčas štohadovaha dakładu 29 červienia ŭ Radzie pravoŭ čałavieka ŭ Ženievie. Pavodle jaje, heta pahruziła našu krainu ŭ atmaśfieru strachu i samavolstva.
Anais Maren
Anais Maren zaklikała mižnarodnuju supolnaść padtrymać biełarusaŭ, jakija vymušana pakinuli krainu z-za represij. Taksama jana vykazałasia za praviadzieńnie niezaležnaha rasśledavańnia, kab abaranić achviar represij i pryciahnuć adkaznych za heta.
U Biełarusi, pavodle dakładčycy, pravodzicca palityka sistematyčnaha ŭzmacnieńnia žorstkaści zakanadaŭstva. U Kryminalny kodeks uniesienyja papraŭki, kab jašče bolš abmiežavać svabodu mirnych schodaŭ. Pa słovach Maren, zakanadaŭstva ŭ Biełarusi ŭžyvajecca advolna.
Papraŭki ŭ Kryminalny kodeks pašyryli śfieru prymianieńnia śmiarotnaha pakarańnia, u tym liku za «płanavańnie» abo «sprobu» ździejśnić terakt. Pry hetym paniaćcie «teraktu» vyznačajuć raspłyvista, pad jaho mohuć padpadać i zakonnyja dziejańni, nakiravanyja na ažyćciaŭleńnie asnoŭnych pravoŭ čałavieka.
Pa słovach Anais Maren, pracy pravaabaroncaŭ i advakataŭ pieraškadžajuć sudovyja i inšyja formy pieraśledu z boku ŭładaŭ.
U svaim dakładzie Maren dakumientuje zakanadaŭstva, palityku i praktyku, jakija pryviali da faktyčnaha źniščeńnia niezaležnych niaŭradavych arhanizacyj, ŚMI i kulturnych arhanizacyj. Pavodle spravazdačy, zakonnaj i krytyčna važnaj pracy pravaabaroncaŭ i advakataŭ taksama pieraškadžajuć pastajannyja sudovyja ci inšyja formy pieraśledu z boku ŭładaŭ.
Maren zaklikała mižnarodnuju supolnaść akazać padtrymku hramadzianam Biełarusi, jakija vymušanyja pakinuć svaju krainu praz represii i zapałochvańnie z boku dziaržavy, i efiektyŭna baranić ich pravy čałavieka.
