Zialenski pakazaŭ videa rakietnaha ŭdaru rasijan pa handlovym centry ŭ Kramienčuhu
Prezident Ukrainy Uładzimir Zialenski ŭ svaim tradycyjnym viačernim zvarocie pakazaŭ zapis videakamieraŭ, jakija zafiksavali ŭdar rasijskich rakiet pa handlovym centru ŭ Kramienčuhu 27 červienia.
Pradstaŭlajučy videa, Zialenski skazaŭ:
«Pa stanie na hety viečar ahulnaja kolkaść rasijskich rakiet, jakija ŭdaryli pa našych haradach, — užo 2811. A kolki jašče avijabombaŭ, kolki artyleryjskich snaradaŭ?!
Rada Biaśpieki AAN siońnia stojačy ŭšanavała pamiać usich ukraincaŭ, zabitych rasijskim vojskam na našaj ziamli. Členy rasijskaj delehacyi azirnulisia na ŭsich prysutnych u zale Rady Biaśpieki i taksama vyrašyli ŭstać — prosta kab nie vyhladać zabojcami adkryta.
Ale ŭsie viedajuć, što heta mienavita rasijski teror, mienavita rasijskaja dziaržava zabivaje ni ŭ čym nie vinavatych ludziej na hetaj vajnie, raźviazanaj suprać ukrainskaha naroda.
Siońnia ja chaču zaviaršyć hety zvarot adnym z takich dokazaŭ — kab nichto nie advažvaŭsia padmanvać adnosna rakietnaha ŭdaru pa handlovym centry ŭ Kramienčuhu.
Rasijskaja rakieta ŭdaryła mienavita pa hetym abjekcie — metanakiravana. Vidavočna, što taki byŭ zahad. Vidavočna, što takija kaardynaty atrymali rasijskija zabojcy dla hetaj rakiety. Jany chacieli zabić jak maha bolš ludziej u mirnym horadzie ŭ zvyčajnym handlovym centry».
Zialenski zapeŭniŭ, što ŭsie datyčnyja da rakietnych udaraŭ pa hramadzianskich abjektach, a taksama rasijskija dypłamaty i prapahandysty, jakija apraŭdvajuć hety terakt, buduć pakaranyja. Zialenski zapeŭniŭ, što va ŭkrainskaj ułady jość imiony i proźviščy ŭsich, chto prymaŭ rašeńnie ab naniasieńni rakietnaha ŭdaru pa Kramienčuhu.