ANT upieršyniu nazvała praŭdzivuju ličbu. Ale pramaŭčała pra inšuju
Telekanał ANT paviedamlaje, što Polšča pieražyvaje składanyja časy z rekordnaj inflacyjaj, i palaki vymušanyja ekanomić navat na praduktach. Ale prapahandysty zmaŭčali pra ličby inflacyi dy inšyja anałahičnyja pakazčyki ŭ Biełarusi. «Naša Niva» pryvodzić ich u paraŭnańni.
«Vajennaja dapamoha Polščy Ukrainie ŭžo skłała paŭpracenta polskaha VUP, pry hetym Varšava praciahvaje abiacać Kijevu miljardy. Sami ž palaki zaciahvajuć pajasy. Siemji ź siarednim prybytkam i nižej ekanomiać na zabaŭkach, palivie i navat praduktach», — maluje apakaliptyčnuju karcinu ANT.
«Imkliva rastuć płaciažy pa kredytach. Nacbank Polščy sprabuje zadušyć inflacyju vysokimi staŭkami. U mai inflacyja dasiahnuła amal 14% — heta rekord za čverć stahodździa. Hetak ža rekordna padajuć i dachody nasielnictva. I aptymistyčnych prahnozaŭ polskija analityki nie dajuć», — zmročna kaža dyktar ANT.
14%-aja inflacyja ŭ Polščy ŭ mai 2022 hoda ŭ paraŭnańni z anałahičnym miesiacam minułaha hoda — heta nie fejk. Inflacyja i praŭda razahnałasia va ŭsim śviecie. Takich vysokich pakazčykaŭ u Polščy nie było z 1998 hoda.
Ale ANT nie zhadvaje, što ŭ Biełarusi inflacyja jašče bolšaja. U mai 2022 hoda hadavaja inflacyja ŭ nas skłała ažno 17%. I bolš za toje, za 25 hadoŭ nie było nivodnaha hoda, kali b u Biełarusi inflacyja była nižejšaja za polskuju.
U XXI stahodździ inflacyja ŭ Polščy ŭsie hady składała adnaznačnyja pakazčyki. U niekatoryja hady ŭ Polščy ŭvohule nazirałasia deflacyja. Voś jak raśli ceny tam:
Hod | Inflacyja, % |
2001 | 5,5 |
2002 | 1,9 |
2003 | 0,8 |
2004 | 3,5 |
2005 | 2,1 |
2006 | 1,0 |
2007 | 2,5 |
2008 | 4,2 |
2009 | 3,5 |
2010 | 2,6 |
2011 | 4,3 |
2012 | 3,7 |
2013 | 0,9 |
2014 | 0,0 |
2015 | -0,9 |
2016 | -0,6 |
2017 | 2,0 |
2018 | 1,6 |
2019 | 2,3 |
2020 | 3,4 |
2021 | 5,1 |
Biełarusi takija ličby i nie śnilisia. Adnosna paśpiachovymi hadami ŭ nas ličylisia tyja, kali inflacyja była adnaznačnaj.
Prapahandysty ŭ svaim siužecie śviadoma źviazvajuć pavyšeńnie inflacyi z vajennaj dapamohaj Polščy Ukrainie. Ale heta — chłuśnia.
Pavyšeńnie cen u śviecie maje hłabalny charaktar, i pačałosia jano jašče da aktyŭnaj fazy ŭkrainska-rasijskaj vajny. Siarod hałoŭnych pryčyn takoj vysokaj inflacyi ŭ śviecie na pieršym miescy kavid, jaki vyklikaŭ kałasalnyja zboi ŭ łancužkach pastavak tavaraŭ i kampanientaŭ dla vytvorčaści.
Nastupnaja istotnaja pryčyna — enierhietyčny kryzis u Jeŭropie, źviazany z deficytam hazu i rekordnymi cenami na spotavym rynku. Darečy, mienavita enierhanośbity ŭ Polščy vyraśli najbolš u canie ŭ paraŭnańni ź inšymi tavarami. Varta nahadać i pra enierhietyčnuju hazavuju vajnu, jakuju raźviazała suprać Jeŭropy Rasija, što vykarystoŭvaje haz jak hieapalityčnuju zbroju.
Što da dapamohi Ukrainie, to davajcie paraŭnajem jaje z pamieram zołatavalutnych reziervaŭ. U Polščy reziervy składajuć 156 miljardaŭ. Dla paraŭnańnia, u Biełarusi — 7 miljardaŭ. Takim čynam, na vajennuju dapamohu Polšča patraciła sumu, jakaja prykładna roŭnaja 1,5% ad zołatavalutnaha zapasu. Iznoŭ paraŭnajem. Zołatavalutnyja reziervy Biełarusi za maj źnizilisia na 352 miljony dalaraŭ, abo prykładna na 5%.