Haru Hiedymina ŭ Vilni znoŭ časova zakryli dla naviednikaŭ
Paśla zafiksavanaha ŭ sieradu apoŭźnia hara časova była zakrytaja dla naviedvalnikaŭ. Jon samoj ničoha nie pahražaje.
Fota Delfi
«Pahrozy stabilnaści hory Hiedymina niama, zakryvajuć haru previentyŭna, kab śpiecyjalisty mahli zaviaršyć acenku jaje stanu paśla daždžu, piša Delfi.lt.
Adkryć haru płanujecca 28 červienia», — śćviardžaje muziej. Apoŭzień na paŭnočna-ŭschodnim schile z boku raki Vilnianki zafiksavali ŭ sieradu ranicaj, paśla taho, jak u horadzie sutki išoŭ livień. Śpiecyjalisty adrazu ž pačali raboty pa likvidacyi nastupstvaŭ.
Muziej paviedamlaje, što za stanam hary ŭvažliva sočać, nie vyklučajecca mahčymaść źjaŭleńnia novych raskolin i apoŭźniaŭ. U doŭhaterminovaj pierśpiektyvie stabilnaść hory płanujecca zabiaśpiečyć u chodzie jaki pravodzicca ciapier prajekta, jon byŭ praciahnuty paśla padpisańnia ŭ mai damovy z novym padradčykam.
Nahadajem, što maštabny apoŭzień na hary Hiedymina ŭ 2017 hodzie pryvioŭ da adkryćcia pachavańniaŭ XIX stahodździa. Paśla archieałahičnych raskopak i nastupnych daśledavańniaŭ vyjaviłasia, što heta pachavańni paŭstancaŭ 1863-1864 hadoŭ, pakaranych śmierciu rasijskimi ŭładami ŭ Vilni. Siarod ich akazalisia i pareštki nacyjanalnaha hieroja Biełarusi Kastusia Kalinoŭskaha.
Pierapachavańnie paŭstancaŭ 22 listapada 2019 hoda stała maštabnaj biełaruskaj nacyjanalnaj demanstracyjaj, uvieś šlach pracesii z Kafiedralnaj płoščy na mohiłki Rosy patanaŭ u bieła-čyrvona-biełych ściahach.
