Praces budzie zakrytym. Pačynajecca sud nad Irynaj Słaŭnikavaj
23 červienia ŭ Homielskim abłasnym sudzie pačynajecca praces nad žurnalistkaj Irynaj Słaŭnikavaj. Joj pahražaje da 7 hadoŭ pazbaŭleńnia voli, nahadvaje «Radyjo Svaboda».
Pavodle SK, pry rasśledavańni kryminalnaj spravy nibyta atrymanyja dokazy taho, što mienavita Słaŭnikava była kiraŭnicaj «Biełsata», pryznanaha ŭ Biełarusi «ekstremisckim farmavańniem».
Mieła vid na žycharstva ŭ Niamieččynie, ale viarnułasia ŭ Biełaruś
Iryna Słaŭnikava naradziłasia ŭ Homieli ŭ siamji vajskoŭca. Pavodle adukacyi jana ekanamist, skončyła «narhas» (ciapierašni Biełaruski dziaržaŭny ekanamičny ŭniviersitet). Pracavała ekanamistam u kamiercyjnych firmach. U siaredzinie 1990-ch trapiła na pasadu buchhałtarki ŭ hazietu «Biełaruskaja maładziožnaja» i pastupova zachapiłasia žurnalistykaj.
Na pačatku 2000-ch Iryna źjechała z baćkami ŭ Niamieččynu, atrymała vid na žycharstva, žyła ŭ Niurnbierhu, ale vytrymała tam tolki hod — viarnułasia ŭ Biełaruś. U intervju «Radyjo Svaboda» ŭ 2003 hodzie Iryna tłumačyła:
«Usio roŭna ja budu adčuvać siabie emihrantkaj. Tam prosta nie cikava i sumna. Tam u mianie pastajanna była depresija, ničoha nie chaciełasia rabić, nikoha bačyć, tamu ja viarnułasia siudy, u Biełaruś… Tudy — tolki ŭ hości. Žyć treba tut, na radzimie, i sprabavać štości źmianić».
Kali byŭ stvorany telekanał «Biełsat», Iryna pajšła pracavać tudy. Peŭny čas pracavała ŭ prahramie «Maju prava». Adnak na momant zatrymańnia žurnalistka ŭžo praciahły čas nie supracoŭničała z «Biełsatam», a była štatnaj supracoŭnicaj polskaha telekanała TVP.
Blizkija kažuć, što ŭ Iryny abvostranaje pačućcio spraviadlivaści. Siabry zhadvajuć, jak u dzień vybaraŭ, 9 žniŭnia 2020 hoda, Irynu bližej da viečara previentyŭna zatrymali. Pryvieźli ŭ RUUS, na ŭsie patrabavańni patłumačyć, za što jaje trymajuć, ničoha ŭciamnaha nie skazali. Jak tolki prajšli try hadziny, Słaŭnikava ŭstała, zajaviła, što pavodle zakona trymać jaje bolš nie majuć prava, i pajšła z RUUS. Milicyjanty byli nastolki ahałomšanyja, što nichto navat nie advažyŭsia jaje spynić.
Praces nad Irynaj Słaŭnikavaj budzie zakrytym. Siabry miarkujuć, što ŭłady prosta bajacca jaje.
«I śledčy, i dziaržabvinavaŭca, i sudździa Dola, jaki vynosiŭ prysudy Cichanoŭskamu, Statkieviču, Łosiku, a ciapier budzie sudzić Słaŭnikavu — jany, ja pierakananaja, bajacca vyhladać bledna na jaje fonie pry ludziach, jakija pryjduć padtrymać Irynu, tamu i zrabili sud zakrytym», — kaža siabroŭka Iryny Halina.
Zachaplajecca dajvinham, vandruje pa ekzatyčnych krainach
Iryna vielmi lubić vandravać, naviedvać roznyja krainy (pabyvała, akramia jeŭrapiejskich krain, na Zanzibary, u Kitai, Mieksycy, Jehipcie). Zachaplajecca dajvinham, raskazvaje jaje adnakurśnica i siabroŭka Halina.
«Heta jana padaravała mnie pieršuju masku i trubku dla nyrańnia, a paśla płavańnia z tyhravymi akułami ŭ Mieksicy paciahnuła vučycca dajvinhu. Usie našy samyja niezvyčajnyja vandroŭki ŭ ekzatyčnyja krainy — heta jaje inicyjatyva. U jaje jość talent znachodzić tury «na kraj śvietu» pa vielmi dastupnych cenach. «Hala, ty nie padrychtavałasia», — kazała jana mnie, kali my pryziamlilisia, naprykład, na Chajnani, i pačynała raskazvać historyju vostrava», — zhadvaje siabroŭka Słaŭnikavaj Halina.
Vielmi lubić žyviołaŭ, asabliva katoŭ
Siabry zhadvajuć śmiešny vypadak, jak Iryna na špilkach i ŭ mini-spadnicy haniałasia za varonaj, adbivajučy ŭ jaje maleńkaha vierabiejku. Siabie jana nazyvaje «kacinaj mamaj».
Spačatku ŭ Iryny žyła kotka redkaj parody «aryjentał», jakuju zavuć Pryncesa Saci. Druhoha kata — biesparodnaha Epsiłona, muž Iryny znajšoŭ u travie ślapym kacianiom i prynios dadomu. Iryna jaho vykormlivała, vychodžvała, nasiła z saboj na pracu, bo jaho treba było karmić kožnyja try hadziny. Dla kacianiaci mierkavali znajści novych haspadaroŭ. Ale tak atrymałasia, što kot zastaŭsia ŭ ich. Ciapier dvarovy kot Epsiłon i parodzistaja aryjentałka Saci žyvuć u Iryninych baćkoŭ.
U Iryny jość darosły syn Michał.
Irynu Słaŭnikavu i jaje muža Alaksandra Łojku zatrymali 30 kastryčnika 2021 hoda ŭ aeraporcie Minska, kali jany viartalisia z adpačynku ź Jehipta. Spačatku abaich asudzili na 15 sutak za «publikacyju ŭ Facebook ekstremisckaha kantentu».
Havorka išła pra materyjały «Biełsata» pieryjadu, kali telekanał jašče nie byŭ pryznany ekstremisckim. Praz 15 sutak ich nie adpuścili, pavieźli ŭ inšaje RUUS, pierazatrymali nibyta «za drobnaje chulihanstva» i znoŭ dali pa 15 sutak aryštu. 26 listapada 2021 hoda Irynu Słaŭnikavu pryznali padazravanaj pa kryminalnaj spravie i pieraviali ŭ śledčy izalatar №1 na «Vaładarku». Pravaabaroncy pryznali jaje palitźniavolenaj.
Pieršapačatkova Słaŭnikavaj vystavili abvinavačvańnie pavodle artykuła 342 KK RB, častka 1 — «arhanizacyja hrupavych dziejańniaŭ, jakija hruba parušajuć hramadski paradak». Potym žurnalistku abvinavacili jašče i ŭ «stvareńni ekstremisckaha farmavańnia» (art. 361, častka 1).
