Hirkin (Strałkoŭ): Bitva za Danbas zakančvajecca vyhadnaj Kijevu ničyjoj
Ihar Strałkoŭ (Hirkin), jaki kamandavaŭ uzbrojenymi farmavańniami, što ŭ 2014 hodzie svaimi dziejańniami zapalili połymia vajny na Danbasie, padčas ciapierašniaj rasijskaj «śpiecapieracyi» niepasrednaha ŭdziełu ŭ vajennych dziejańniach nie biare. Ale pilna za imi sočyć i niaspynna kamientuje, prytym pastajanna trymajučysia ŭ nadzvyčaj krytyčnym adnosna dziejańniaŭ vajennaha i palityčnaha kiraŭnictva Rasii rečyščy. Jaho nazirańni, jakija tyčacca vajskovych aśpiektaŭ, nie pazbaŭlenyja cikavaści, bo žorstka krytykuje jon dziejańni taho boku, jakomu sam adkryta simpatyzuje. Hetym razam Hirkin padvodzić vyniki ŭžo, na jahonuju dumku, u cełym zavieršanaj «bitvy za Danbas».
Hirkin kanstatuje kančatkovaje zaviaršeńnie druhoha etapu «śpiecapieracyi». Na jaho dumku, nastupleńnie ŭzbrojenych siłaŭ Rasii i samaabvieščanych «DNR» i «ŁNR» całkam vydychnułasia. Rasijskija vojski dasiahnuli miažy svaich nastupalnych mahčymaściaŭ, tamu ciapier «maksimum, što možna čakać — što jany zdolejuć «damučyć» pramzonu Sievieradaniecka i reštki płacdarma USU na Sievierskim Dancy ŭ hetym rajonie». Na astatnich učastkach u aktyŭnych bajavych dziejańniach užo tryvaje apieratyŭnaja paŭza.
Hirkin zaŭvažaje, što padčas bajoŭ na Danbasie abodva baki panieśli vielizarnyja straty. Na jaho dumku, čałaviečyja straty va ŭkraincaŭ bolšyja, ale jany zdolnyja chutka ich papoŭnić. Samaje hałoŭnaje — što ŭkrainski bok nie zadziejničaŭ svaich asnoŭnych stratehičnych reziervaŭ, ćviorda trymajučysia abarončaj taktyki.
Ahulny vynik majska-červieńskaj bitvy na Danbasie Hirkin aceńvaje jak ničyjny. Rasijskija vojski, pavodle jaho, nie zdoleli ni dasiahnuć pastaŭlenych stratehičnych metaŭ («vyzvaleńnia» ŭsiaho Danbasa), ni navat da ich istotna nablizicca. Ale šerah važnych terytoryj i bujnych nasielenych punktaŭ (Papasnaja, Čyrvony Liman, Sievieradanieck) im uziać usio ž udałosia, jak i adkinuć USU za Sievierski Daniec i razhramić «amal daščentu» šerah častak i złučeńniaŭ USU.
Ukrainskaje kamandavańnie ŭ cełym svaju hałoŭnuju zadaču vykanała. USU ŭdałosia ŭtrymacca ŭ rajonie Horłaŭki, nie dapuścić razhromu hałoŭnych sił svajoj Danieckaj hrupoŭki i vyjhrać čas na stvareńnie novych reziervaŭ. Choć heta, na dumku Hirkina, kaštavała vialikich strataŭ i padzieńnia maralnaha duchu častki vojskaŭ.
U cełym čaša vahaŭ, jak śćviardžaje Hirkin, schiliłasia na bok Kijeva. Bo jamu, maŭlaŭ, udałosia vyjhrać čas. A rasijskaja armija ciapier maje patrebu ŭ pierafarmavańni i bujnych papaŭnieńniach dla adnaŭleńnia bajazdolnaści.
Kolki budzie doŭžycca apieratyŭnaja paŭza i kali pačniecca letniaja bitva za inicyjatyvu, Hirkin dakładna kazać nie biarecca. Na jaho dumku, terminy mohuć być ad tydnia da miesiaca-paŭtara, naŭrad ci daŭžej. Ciahnuć z pačatkam novaj nastupalnaj apieracyi da vosieni, tryvajučy ŭsio bolš častyja ŭdary pa Daniecku i ŭłasna terytoryi RF, rasijskija vajskoŭcy naŭrad ci zmohuć, dakładniej, im nie dazvolić hetaha palityčnaje kiraŭnictva, jakomu vostra patrebnyja nieadkładnyja «pieramohi».
Hirkin miarkuje, što novaja bitva moža mieć, jak jon vykazvajecca, «sustrečna-roznanakiravany charaktar». Heta značyć, rasijskija vojski mohuć nastupać u adnym rehijonie, a USU — u inšym, i abodva baki buduć sprabavać «złavić» sapiernika na paśpiachovaj abaronie ŭ spałučeńni z kontrudarami.
Daniecki front, vidać, na niejki čas stanie «cichim», choć abstreły i bai miascovaha značeńnia na im praciahnucca. Ale asnoŭnyja bitvy Hirkin prahnazuje ŭ rajonie Chiersona i Charkava.
