Ministr abarony Ukrainy: Rasijanie źbiralisia zachapić Kijeŭ za 12 hadzin
Rasijskija vajskoŭcy raźličvali, što Kijeŭ padzie i jaho možna budzie ŭziać pad kantrol na praciahu 12 hadzin paśla ŭvarvańnia. Pra heta zajaviŭ ministr abarony Ukrainy Alaksiej Reźnikaŭ, paviedamlaje «RBK-Ukraina» sa spasyłkaj na CNN.
Zabity rasijski vajskoviec kala źniščanaj mašyny. Luty 2022. Fota: AP
Pa jaho słovach, u adnaho z rasijskich vajskoŭcaŭ, zabitaha padčas ŭvarvańnia, byŭ znojdzieny dakumient, u jakim byli paznačanyja vajennyja celi Rasii.
«Jany dumali, što praz 12 hadzin buduć u centry Kijeva. Pra heta ŭ dakumiencie havaryłasia», — zajaviŭ jon.
Reźnikaŭ padkreśliŭ, što rasijanie naiŭna ličyli, što na praciahu 72 hadzin paśla ich uvarvańnia ŭkrainski ŭrad pakinie stalicu.
«Ščyra kažučy, našy partniory ŭ roznych stalicach śvietu taksama byli naiŭnyja. Jany kazali nam, što ŭvarvańnie niepaźbiežnaje, i vy prajhrajecie. U vas jość tolki 72 hadziny. Tamu jany nie dali nam ciažkaha ŭzbrajeńnia», — dadaŭ ministr.
Alaksandr Łukašenka ŭ intervju rasijskamu telekanału ŭ lutym taksama zajaŭlaŭ, što vajna praciahniecca 3—4 dni, a ŭ pačatku vajny zaklikaŭ ukraincaŭ pryniać patrabavańni Rasii.
Pavodle jaho słoŭ, tolki paśla taho, jak Ukraina ŭ kancy sakavika vyzvaliła Kijeŭskuju vobłaść, jaje zachodnija partniory pačali pastaŭlać bolš ciažkaje ŭzbrajeńnie.
