Ad kaho atrymajem kuchtaloŭ u jeŭrakubkach? Biełaruskija kłuby daviedalisia apanientaŭ pa futbolnych kvalifikacyjach
Vaładar kubka krainy, «Homiel», dy vice-čempijon respubliki, barysaŭski BATE, startujuć u druhim kvalifikacyjnym raŭndzie Lihi Kanfierencyj.
Uśled za salihorskim «Šachcioram» dy minskim «Dynama» atrymali supiernikaŭ pa kantynientalnym adbory jašče dva ajčynnyja kłuby. Skazać pa praŭdzie, nie pašancavała ź losavańniem, što adbyłosia ŭ šviejcarskaj štab-kvatery UEFA, ni «Homielu», ni barysaŭskamu BATE.
Pieramožcy kubka Biełarusi-2022 u druhim kvalifikacyjnym raŭndzie Lihi Kanfierencyj pazmahajucca z hrečaskim «Arysam» z Sałonikaŭ. Hulni adbuducca 21 i 28 lipienia. Nahadajem, što jeŭrapiejskaja izalacyja vymahaje ad biełaruskich kłubaŭ pravodzić chatnija matčy za miežami respubliki. Tamu dla pryjoma «Arysa» hamialčanam treba budzie abrać adnu z aren Armienii, Azierbajdžana albo Hruzii.
BATE z usich mahčymych varyjantaŭ vypaŭ pradstaŭnik čempijanata Turcyi, «Kańjaspor». Sustrečy projduć u tyja ž daty, što i ŭ «Homiela», ale barysaŭčanie pryvitajuć apanientaŭ albo ŭ Vienhryi, albo ŭ Turcyi.
Taksama stali viadomy kamandy, jakija vypaduć «Šachcioru» dy minskamu «Dynamu» ŭ vypadku pośpiecha biełaruskich kłubaŭ na starcie adbora. Čempijon krainy z Salihorska, kali adužaje słavienski «Marybor», u druhim raŭndzie Lihi Čempijonaŭ kinie vyklik lepšamu z pary «Šeryf» (Małdova) — «Zryński» (Bośnija i Hiercahavina). Što ž tyčycca staličnaha kłuba, to pry skareńni čarnahorskaha «Dziečyča» nastupnym jaho apanientam budzie izrailski «Chapael» ź Biejer-Ševy. Hulni adbuducca 21 i 28 lipienia.
