Amierykanskija vajskoŭcy: Savieckaja i rasijskaja zbroja ŭ Jeŭropie skončyłasia, ciapier Ukrainie možna davać tolki zachodniuju
Amierykanskija vajskovyja krynicy raspaviali na ŭmovach ananimnaści ahienctvu Frans pres, što zapasy zbroi i bojeprypasaŭ savieckaj i rasijskaj vytvorčaści ŭ Jeŭropie skončylisia, tamu Ukraina zaraz zaležyć vyklučna ad zachodnich pastavak uzbrajeńniaŭ, piša Bi-bi-si.
Ahoń z ustanoŭki HIMARS. Zdymak ilustracyjny. Fota: AP / Mosa'ab Elshamy
Na pieršych etapach vajny zachodnija krainy pierapraŭlali va Ukrainu pieravažna zbroju savieckaha ŭzoru, znajomuju ŭkraincam. Staryja zapasy takoj zbroi byli ŭ mnohich uschodniejeŭrapiejskich krainach, ale ciapier jany vyčarpalisia.
Zachad pastupova naroščvaje pastaŭki Ukrainie svaich ciažkich uzbrajeńniaŭ i bojeprypasaŭ da ich, ale dla abychodžańnia ź imi patrabujecca davoli doŭhi pieryjad navučańnia, dy kolkasna takoj zbroi pakul niedastatkova.
Na minułym tydni ZŠA abjavili ab pieradačy Ukrainie čatyroch sistemaŭ załpavaha ahniu HIMARS. Ale daradca kiraŭnika ofisa prezidenta Ukrainy Michaił Padalak u čaćvier skazaŭ, što dla paŭnavartasnaha kontrnastupleńnia krainie nieabchodna ich nie mienš za 150.
Pa słovach krynicy Frans-pres, hetyja pieršyja čatyry ŭstanoŭki — svajho rodu probny šar, kab pierakanacca, što ŭkraincy asvoili novuju techniku i pryniali miery dla taho, kab jana nie trapiła ŭ ruki praciŭnika. Ale ŭ Hiermanii ŭžo padrychtavanyja dadatkovyja zapasy HIMARS, i ich možna budzie nieadkładna pieradać Ukrainie, kali pieršy vopyt akažacca stanoŭčym, dadała krynica.
Razam z tym Vašynhton pakul vyklučaje mahčymaść pastaŭki bajavych bieśpiłotnikaŭ Grey Eagle, zdolnych dasiahać rasijskich bujnych haradoŭ. Pra toje, što takaja mahčymaść razhladałasia, pisała 1 červienia ahienctva Rejter.
