Hienštab Ukrainy: Žytomirščynu ŭnačy bambili ź Biełarusi
Namieśnik načalnika Hałoŭnaha apieratyŭnaha ŭpraŭleńnia Hienieralnaha štaba Uzbrojenych sił Ukrainy Alaksiej Hromaŭ zajaviŭ pra čarhovy fakt vykarystańnia vajskovych aeradromaŭ Biełarusi dla abstrełaŭ ukrainskaj terytoryi.
Nastupstvy abstrełu Žytomirskaj vobłaści ŭ sakaviku 2022 hoda
«Prykmietaŭ farmavańnia na terytoryi Biełarusi ŭdarnych, nastupalnych hrupovak nie nazirajem, ale, naprykład, siońnia z adnaho z aeradromaŭ Respubliki Biełaruś praciŭnik, Uzbrojenyja siły Rasijskaj Fiederacyi, padniaŭ u pavietra samaloty i nanios rakietnyja ŭdary pa terytoryi Ukrainy», — zajaviŭ Alaksiej Hromaŭ 9 červienia na bryfinhu ŭ Kijevie.
Na prośbu karespandenta «Svabody» ŭdakładnić rehijon abstrełaŭ i aeradromaŭ jon adkazaŭ:
«1.15 nočy, Žytomirski rehijon, rakietny ŭdar, kryłataja rakieta Ch59. Dva samaloty dałučanyja z rajona Mazyra Homielskaj vobłaści i aeradroma «Baranavičy». Dva samaloty Su-34 i adzin Su-30».
U toj ža čas Alaksiej Hromaŭ nie paviedamiŭ pra nastupstvy hetaha abstrełu.
Raniej jon zajaŭlaŭ, što «z terytoryi Biełarusi było 1211 vyletaŭ avijacyi — bolš za 20% ad ahulnaj kolkaści — i 61 pusk kryłatych rakiet typu «Iskander» z metaj paražeńnia abjektaŭ krytyčnaj infrastruktury Ukrainy».
Kiraŭnik Žytomirskaj vobłaści Vital Buniečka na svajoj staroncy ŭ Fejsbuku udakładniŭ, što rakieta paceliła ŭ šmatpaviarchovik u Navahradzie-Vałynskim. Pra zahinułych ci paciarpiełych jon nie paviedamiŭ.
Na minułym tydni kiraŭnik Žytomirskaj abłasnoj dziaržaŭnaj administracyi Vital Buniečka zajaviŭ, što z pačatku rasijskaha ŭvarvańnia z terytoryi Biełarusi byli akupavanyja 9 nasielenych punktaŭ vobłaści, a abstreły rehijona ažyćciaŭlalisia jak z Kaśpijskaha mora, tak i vajskovaj avijacyjaj, jakaja dysłakavałasia na terytoryi Biełarusi.
«My štodzień naroščvajem abaranazdolnaść, i kali niechta zachoča zajści z terytoryi Biełarusi pa ziamli, to my zładzim takoje apramietnaje piekła, što nichto siudy pa ziamli dakładna nie pryjdzie», — skazaŭ Vital Buniečka žurnalistam padčas svajoj pajezdki ŭ Oŭruč.
