Astranomy znajšli padobnuju da Ziamli płanietu kala susiedniaj da Sonca zorki
Mižnarodnaja hrupa astranomaŭ adkryła novuju płanietu ziamnoha typu, jakaja krucicca vakoł susiedniaj zorki. Znojdzienaja ekzapłanieta atrymała abaznačeńnie Ross 508 b i adnosicca da kłasa płaniet «Nadziamla», paviedamlaje Phys.org.
Fota ilustracyjnaje
«Nadziemlami» navukoŭcy nazyvajuć bolšyja za Ziamlu płaniety, jakija nie pieravyšajuć masu Niaptuna — vośmaj płaniety Soniečnaj sistemy.
Astranomy z dapamohaj japonskaha teleskopa «Subaru» vyśvietlili, što hetaja płanieta jak minimum u čatyry razy bolšaja za Ziamlu. Jana krucicca vakoł karlikavaj zorki kłasa M, jakaja małaja i adnosna chałodnaja ŭ paraŭnańni z Soncam.
Płanieta Ross 508 b raźmiaščajecca ŭ sistemie, jakuju možna nazvać našym adnosnym susiedam — za 36,6 śvietłavych hadoŭ ad Ziamli. Taksama płanieta zacikaviła navukoŭcaŭ z-za taho, što jana krucicca ŭ tak zvanaj «zonie Złataŭłaski» — prastory pablizu zorki, dzie tempieratura spryjalnaja dla isnavańnia vadkaj vady, a takim čynam, patencyjna i dla žyćcia.
Nazirajučy za niabiesnym ciełam, navukoŭcy vyśvietlili, što płanieta robić abarot vakoł svajoj zorki pryblizna za 10,75 dnia.
Niahledziačy na toje, što płanieta naŭrad ci budzie prydatnaj dla žyćcia, jakoje my bačym na našaj płaniecie, jaje adkryćcio dapamoža navukoŭcam šukać płaniety, padobnyja na Ziamlu, pablizu zorak, jakija źziajuć słabiej za sonca.
