Sankcyi na kalij zdymać možna, ale na ŭmovach ekspartu praz handlovy dom, jaki budzie kantralavacca Cichanoŭskaj — niezvyčajnaje mierkavańnie
ZŠA hatovyja prypynić sankcyi suprać biełaruskaha kaliju ŭ abmien na tranzit ukrainskaha ziernia ŭ port Kłajpiedy. Štab Cichanoŭskaj suprać. Ale ŭ hetaj zadačy mahło b być kreatyŭnaje rašeńnie, jakoje b nabliziła Biełaruś da kruhłaha stała ŭładaŭ i apazicyi, piša čytač «Našaj Nivy» Mikanor Patocki.
Zahruzka vahonaŭ kalijnymi ŭhnajeńniami. Fota: «Biełaruśkalij»
Realnaść takaja, što navat Pucin jašče nie navučyŭsia pastaŭlać haz pa pavietry adrazu na zavody ŭ Bavaryi, dla tranzitu jamu davodzicca karystacca terytoryjaj voraha — Ukrainy.
Heta taja realnaść, u jakoj žyvie Rasija: akno dla pastavak jaje stratehičnaj syraviny ŭ Jeŭropu — heta Ukraina.
Niama pryčyn dumać, što takija ž umovy pracy nielha naviazvać i Minsku.
Unutrypalityčnaja situacyja ŭ Biełarusi i vyciskańnie socień tysiač hramadzian za miažu stvaryła abstaviny, pry jakich emihracyjnyja centry stali lehitymnym hołasam Biełarusi.
Kalij — nie piersanalnaja majomaść Łukašenki, heta skarb narodu.
Kali śviet choča dazvolić Łukašenku paŭhoda pradavać kalij, to chaj, ale tolki praz handlovy dom, jaki kantralujecca Cichanoŭskaj. Suadnosiny dolaŭ i raźmierkavańnie prybytkaŭ možna abmiarkoŭvać, heta i daść padstavy dla pieramovaŭ pamiž demakratami i łukašenkaŭcami.
Što zrobić z kalijnymi hrašyma režym jasna — vykarystaje ich dla praciahnieńnia palityčnaha žyćcia Łukašenki.
Ale, budučy całkam ščyrymi pierad saboj, jahonamu palityčnamu žyćciu, pakul za śpinaj Pucin, i tak ničoha nie pahražaje. Represii nie spyniajucca i biez kalijnych prybytkaŭ, i na rakietnyja kompleksy hrošaj chapaje.
U toj ža čas sotni tysiač biełarusaŭ sa skalečanymi losami taksama patrabujuć dapamohi. Hrošy treba biełaruskim ŚMI, navucy, kultury — biez usiaho hetaha nacyja nie moža zachavacca, a łukašysty ŭnutry krainy ŭsio heta abo zaniadbali, abo prosta źniščajuć, va ŭhodu svaim karotkaterminovym intaresam. Biełaruski biznes taksama patrabuje inviestycyj — prytym što ŭsio bolš pradprymalnikaŭ vyvodziać svaje biznesy za miažu. Voś na što traciłasia b taja častka hrošaj ad biełaruskaha kaliju, jakaja b išła ŭ Handlovy dom Cichanoŭskaj. Heta budzie šaniec pakazać demakratam, što jany mohuć prazrysta i efiektyŭna raźmiarkoŭvać resursy.
Ideja prodažu kaliju praź Cichanoŭskuju — heta win-win-win. Zachad atrymlivaje maralnaje prava na źniaćcie sankcyj (luby handal z Łukašenkam hramadskaja dumka inakš asudzić), Łukašenka atrymlivaje źniaćcie sankcyj, hramadstva atrymlivaje svaju dolu. Vy skažacie, što heta nierealistyčnaja ideja. Ale biez takich idej out-of-the-box nie abyścisia, kab vyvieści našu nacyju z tupika i nablizić realnyja pieramovy ŭłady i apazicyi, damoŭny pierachod ad dyktatury da demakratyi.
