Kupała, Šahał, bitniki, astrałohija. Padborka cikavostak z prahramy «Nočy muziejaŭ» na luby hust
20, 21 i 22 maja ŭ biełaruskich muziejach buduć nasyčanyja dni: projduć tematyčnyja mierapryjemstvy, pryśviečanyja suśvietnaj štohadovaj akcyi «Noč muziejaŭ». Sabrali samyja cikavyja varyjanty, kab pravieści vychodnyja kulturna.
Dla tych, chto za raznastajnaść
Vielmi nasyčanaja prahrama čakajecca ŭ Nacyjanalnym mastackim muziei.
Z 16.00 da poŭnačy 21 maja projduć lekcyi i majstar-kłasy ad Indyjskaha kulturnaha centra, skietč-kvest, kancert A.M.A.D.I.S. Brass (artystaŭ arkiestra Vialikaha teatra Biełarusi), majstar-kłass pa placieńni z sałomy i nie tolki. Asobna buduć aformlenyja interaktyŭnyja zony dla dziaciej.
Darečy, 22 maja akcyja praciahniecca ŭ filijale mastackaha muzieja — Muziei biełaruskaha narodnaha mastactva ŭ Raŭbičach, — dzie a 14-j hadzinie projdzie kancert ansambla «Kamiernyja salisty Minska».
Kvitok: 15 rubloŭ dla darosłych i 7 dla dziaciej.
Dla fanataŭ Minska i Janki Kupały
U litaraturnym muziei Janki Kupały akcyja projdzie pad znakam dźviuch jubilejnych dat — 140-hodździa z dnia naradžeńnia Janki Kupały i 955-hodździa Minska. Haściej čakaje interaktyŭnaja prahrama, padčas jakoj možna trapić u atmaśfieru Trajeckaha kirmašu hubiernskaha Minska pačatku XX st.
Hości zmohuć adčuć siabie ŭdzielnikami Akademičnaj kanfierencyi pa reformie biełaruskaha pravapisu, jakaja prachodziła ŭ Minsku ŭ 1926 hodzie (u joj braŭ udzieł Janka Kupała). Hulni, konkursy i viktaryny taksama ŭ prahramie.
Kvitok: 5 rubloŭ.
Dla tych, chto płanuje navučycca novamu
Muziejny kompleks «Dudutki» anansuje cełuju sieryju majstar-kłasaŭ: sałomaplacieńnie, hančarstva, drevaapracoŭka, tkactva, bortnictva, kavalskaje ramiastvo. Za vizualnyja ŭražańni adkaža ahniavy cyrk «Kresiva» ŭ kampanii z šamanskim rokam. A za muzyčnaje afarmleńnie — škoła etničnych bubnaŭ «TekaDUM».
Kvitok: dla dziaciej — 8 rubloŭ, dla darosłych — 15.
Dla fotaamataraŭ
Noč muziejaŭ u majsterni Zaira Azhura budzie pryśviečanaja fatahrafii, u pieršuju čarhu — archiŭnaj. Vadzim Kačan, naprykład, raskaža historyju fotakłuba «Viečarovy Minsk». A Juryj Jelizarovič — historyju navučalnaj studyi i fotakłuba «Panarama». Buduć prademanstravanyja pracy fotakłuba «Niva».
Asobna pakažuć prahramu karotkamietražnych dakumientalnych filmaŭ pra fatohrafaŭ i fotamastactva.
Kvitok: 7 rubloŭ.
Dla tych, chto šanuje biełaruskija tradycyi
Noč muziejaŭ u «Łošyckaj siadzibie» prachodzić u hetym hodzie pad nazvaj «U viry tradycyj». U jakim ža viry płanujuć tam zakružyć? Pa-pieršaje, zapłanavany majstar-kłas pa tradycyjnych biełaruskich tancach i viasnovyja karahody na łuzie ŭ Łošyckim parku. Zaprošany hość — muzyka Ivan Kirčuk — raspaviadzie pra viasielnyja tradycyi biełarusaŭ. Tam ža navučać vyrablać lalku-bierahiniu, štampy dla paštovak z harodniny i cikavy hierbaryj.
Startuje prahrama 21 maja a 13-j hadzinie, a razyścisia ŭsich paprosiać a 22-j.
Kvitok: 10 rubloŭ.
Dla tych, chto kajfuje ad mistyki
U muziei «Dom Vańkovičaŭ» 21 maja budzie vialikaja kolkaść astrołahaŭ. Tut vam i budučyniu pradkažuć pa zorkach, i astrałahičnyja padziei dla vašaha znaka zadyjaka. Ale heta daloka na ŭsio: u prahramie taksama anansavany teatr cieniaŭ pa tvory Jana Barščeŭskaha «Šlachcic Zavalnia», muziejny kvest-hulnia i majstar-kłasy: naprykład, jak zrabić makiet muzieja.
Kvitok: 5 rubloŭ.
Dla tych, chto lubić saviecki andehraŭnd
«Adkručvajem mašynu času na nastupny nastroj: 1950-1970-ja hady, bit-paezija, džaz i buhi-vuhi, tufli na mannaj kašy, dzieci sonca, bob na hałavie, kaźlinyja barodki i vytančanyja vusy…» — napisana ŭ anonsie viečaryny ŭ Litaraturnym muziei Pietrusia Broŭki.
Usio heta budzie padavacca praz nastupnyja zabavy: lekcyju pra bitnikaŭ, majstar-kłas pa lindzi-chopie, pieśni pad hitaru, čabarovuju harbatu, nastołki i čorna-biełyja filmy na praścinie, kab maksimalna pahruzicca ŭ atmaśfieru savieckich kvaternikaŭ.
Kvitok: 5 rubloŭ.
Dla tych, chto nie ŭ Minsku
Muziej Marka Šahała ŭ Viciebsku
Cikavaja prahrama čakajecca viečaram 20 maja ŭ muziei Marka Šahała ŭ Viciebsku — akurat da 135-hodździa z dnia naradžeńnia mastaka. Budzie i prezientacyja jaho viadomaj hrafiki, i kinapakaz, i muzyčnaja prahrama. Uvachod volny.
Niedaloka ad Viciebska ŭ muziei-siadzibie I. Repina «Zdraŭniova» 21 maja projdzie kancert džazavaj muzyki «Jazz do it», budzie pakazanaje šou bubnačoŭ «BARABAND», a ŭsich žadajučych pakatajuć na ciepłachodzie pa Zachodniaj Dźvinie. Kvitki dla darosłych kaštujuć 15 rubloŭ, dla dziaciej — 8.
Noč muziejaŭ u Homieli ŭ pałacy Rumiancavych-Paskievičaŭ budzie pryśviečanaja demanstracyi artefaktaŭ: naprykład, aryhinała rukapisu «Hora ad rozumu» Hrybajedava, a taksama Jevanhiella, nadrukavanaha Piatrom Mścisłaŭcam. Možna budzie pieraŭvasobicca ŭ viadomych ludziej u pyšnym interjery epochi Napaleona III i navučycca rabić niezvyčajnyja aryhami. Kvitki — 10 rubloŭ dla dzietak i piensijanieraŭ i 15 — dla darosłych.
Lidski historyka-mastacki muziej arhanizuje muziejny trypcich «Mahija ahniu i śviatła». Imprezy zapłanavanyja na 20-22 traŭnia. Jany buduć arhanizavanyja ŭ historyka-mastackim muziei, Lidskim zamku i Domie Valancina Taŭłaja. Budzie i kancert opiernych śpievakoŭ, i teatr cieniaŭ, i chadulisty, i ahniavoje šou. Ceny ad 6 da 12 rubloŭ.
«Noč muziejaŭ» — dadatkovaja nahoda naviedacca ŭ cudoŭnuju Harodniu. U miascovym historyka-archieałahičnym muziei 21 traŭnia ŭ 20.00 pačniecca noč detektyŭnych historyj z hulniami ŭ «Mafiju» i kvestami. Za muzyčny nastroj na śviacie buduć adkazvać Dj Sekone100 i kavier-bend Hit Hunter. Biez fotazony i fudkorta taksama nie abydziecca. Što tyčycca cen, to za ŭvachod prosiać ad 8 da 12 rubloŭ.
Jašče bolš pra prahramu «Nočy muziejaŭ» u vašym horadzie možna daviedacca na śpiecyjalizavanym sajcie.
Čytajcie taksama:
Adkryłasia virtualnaja vystava mastackich tvoraŭ, źniatych z ekspazicyi «Art-Minska»
Kazki ad Malavanyča, multy i «Kałychanka». Što pahladzieć pra dziciačym Jutub-kanale «Bejbus»
