188 suprać 8: parłamient Finlandyi ŭchvaliŭ padaču zajaŭki ŭ NATA
Parłamient Finlandyi na pasiadžeńni ŭ aŭtorak uchvaliŭ padaču zajaŭki na ŭstupleńnie krainy ŭ Paŭnočnaatłantyčny aljans.
Fota Yle.fi
«Za» prahałasavali 188 deputataŭ, paviedamlaje CNN, suprać było padadziena vosiem hałasoŭ.
Z vaśmi čałaviek, jakija prahałasavali suprać, 6 reprezientujuć krajnie levuju partyju VAS — pierajemnicu kolišniaj Kampartyi Finlandyi, jakaja była afilavanaja z Maskvoj. Cikava, što navat u hetaj partyi suprać vykazalisia tolki 6 parłamientaryjaŭ z 16.
Ciapier rašeńnie parłamienta pavinien zaćvierdzić prezident Finlandyi Saŭli Niiniścio. Miarkujecca, što jon zrobić heta ŭ najbližejšy čas.
Raniej, u aŭtorak ministr zamiežnych spraŭ Šviecyi Ana Lind padpisała zajaŭku na ŭstupleńnie krainy ŭ NATA.
Finlandyja i Šviecyja sumiesna padaduć zajaŭki na ŭstupleńnie ŭ NATA ŭ sieradu, paviedamiła kiraŭnik šviedskaha ŭrada Mahdalena Andersan.
Yle.fi
«My damovilisia, što Šviecyja i Finlandyja projduć praz uvieś praces ruka ab ruku, i zaŭtra my sumiesna padadzim našy zajaŭki», — skazała jana na sumiesnaj pres-kanfierencyi z prezidentam Finlandyi Saŭli Niiniścio ŭ Stakholmie.
Jak tolki Finlandyja skončyć pracedury pa afarmleńni svajoj zajaŭki, zvaroty abiedźviuch krain buduć pieradadzienyja hienieralnamu sakrataru Paŭnočnaatłantyčnaha aljansu Jensu Stołtenbierhu.
