Italjanskaja palicyja: u hałasavańnie na «Jeŭrabačańni» ŭmiešvalisia rasijskija chakiery
Ułady Italii praduchilili kibierataki na «Jeŭrabačańni», piša Reuters sa spasyłkaj na italjanskuju palicyju. Da napadaŭ datyčnyja prarasijskaja hrupoŭka Killnet i jaje padraździaleńnie Legion, upeŭnienyja italjanskija pravaachoŭniki.
Kalush Orchestra paziruje ź pieramožnaj statuetkaj «Jeŭrabačańnia». Fota: AP Photo/Luca Bruno.
Napady na sietkavuju infrastrukturu adbylisia padčas paŭfinału 10 traŭnia i finału konkursu ŭ noč z 14 na 15 traŭnia. Adnak ich udałosia praduchilić. Mienavita ŭ paŭfinale 10 traŭnia i vystupała Ukraina.
Taksama ŭ noč praviadzieńnia piesiennaha konkursu ŭ telehram-kanale Killnet źjaviłasia paviedamleńnie, jakoje abražała ŭkrainski hurt Kalush Orchestra.
11 traŭnia kibieratacy padvierhnulisia sajty Ministerstva abarony, Sienata i inšych viedamstvaŭ Italii, adkaznaść za ŭzłomy ŭziała na siabie Killnet.
14 maja ŭkrainski hurt Kalush Orchestra pieramoh na «Jeŭrabačańni-2022» u italjanskim Turynie. Pa vynikach hałasavańnia žury jany byli tolki 4-ja, ale atrymali rekordnyja ŭ historyi konkursu 439 bałaŭ z 468 mahčymych ad hledačoŭ.
Ukraina pieramahła na «Jeŭrabačańni», dziakujučy rekordnaj padtrymcy telehledačoŭ
