Iłan Mask pastaviŭ kuplu Twitter na paŭzu, akcyi kampanii ŭpali
Iłan Mask zajaviŭ, što ździełka na 44 młrd dalaraŭ pa kupli kampanii prypynienaja da tych časoŭ, pakul jon nie atrymaje infarmacyju pra kolkaść fejkavych akaŭntaŭ u sacyjalnaj sietcy. Akcyi kampanii adrazu ž abvalilisia na 25%, ale paźniej častka padzieńnia była adyhranaja, kali pradprymalnik u novym tvicie napisaŭ, što pa-raniejšamu maje namier davieści ździełku da kanca, piša Bi-bi-si.
Iłan Mask. Fota: Reuters
Iłan Mask śćviardžaje, što čakaje infarmacyi, jakaja paćviardžaje raźliki, što fejkavyja akaŭnty ŭ sacsietcy składajuć nie bolš za 5% ad ahulnaj kolkaści štodzionnych aktyŭnych karystalnikaŭ. Adnak analityki nie vyklučajuć, što jon tym samym sprabuje źbić canu abo navat šukaje padstavu, kab admovicca ad kupli kampanii.
Voś pieršy tvit Maska, jaki vyklikaŭ abvał koštu kampanii.
Twitter deal temporarily on hold pending details supporting calculation that spam/fake accounts do indeed represent less than 5% of usershttps://t.co/Y2t0QMuuyn
Zrešty, praź niekalki hadzin paśla napisańnia pieršaha tvita, Mask zajaviŭ, što pa-raniejšamu źbirajecca kuplać Twitter. Pa ŭmovach ździełki toj, chto pieradumaje, pavinien budzie zapłacić druhomu boku niaŭstojku ŭ pamiery 1 młrd dalaraŭ.
Kala dvuch tydniaŭ tamu Twitter paviedamiŭ, što ŭ pieršyja try miesiacy hetaha hoda na fejkavyja akaŭnty prychodziłasia mienš za 5% jaho štodzionnych aktyŭnych karystalnikaŭ. Tym nie mienš, kampanija abmoviłasia, što dakładna vyznačyć kolkaść takich akaŭntaŭ z dapamohaj najaŭnych instrumientaŭ składana.
«Faktyčnaja kolkaść fejkavych akaŭntaŭ moža być vyšejšaja, čym my mierkavali. Ale my ŭvieś čas imkniemsia ŭdaskanalvać našu zdolnaść aceńvać ich ahulnuju kolkaść», — skazana ŭ paviedamleńni kampanii.
Mask, samy bahaty čałaviek u śviecie pa viersii časopisa Forbes, ciapier vyvučaje spravazdaču kampanii. U Twitter užo daŭno jość prablema z fejkavymi ŭlikovymi zapisami, jakija vykarystoŭvajucca dla publikacyi prapłačanaha kantentu, tak zvanymi botami.
Mask zajaŭlaŭ, što źbirajecca ačyścić sacsietku ad botaŭ, a taksama abjaŭlaŭ ab šerahu inšych źmianieńniaŭ, uklučajučy viartańnie zabłakavanych ulikovych zapisaŭ, takich, naprykład, jak ulikovy zapis byłoha prezidenta ZŠA Donalda Trampa.
Čytajcie taksama:
Iłan Mask nabyŭ Twitter
