Sienatar ad štata Kientuki zabłakavaŭ zakonaprajekt ab vydzialeńni Ukrainie dapamohi amal na 40 miljardaŭ dalaraŭ
Sienatar-respublikaniec ad Kientuki Rend Poł adnaasobna zabłakavaŭ zakonaprajekt ab vydzialeńni Ukrainie dapamohi amal na $ 40 młrd. Jon zrabiŭ heta nie tamu, što pryncypova suprać dapamohi Ukrainie. Ale kaža, što baicca paŭtareńnia sumnaha vopytu Afhanistana i choča źmieny farmulovak, kab za vykarystańniem dapamohi byŭ bolšy nahlad, paviedamlaje The Wall Street Journal.
Rend Poł skazaŭ u svaim vystupleńni:
«Ja davaŭ prysiahu Kanstytucyi ZŠA, a nie jakoj-niebudź inšaj krainy. I jakimi b dobrymi ni byli pryčyny, meta majho ofisa — nacyjanalnaja biaśpieka ZŠA. My nie možam vyratavać Ukrainu, padryvajučy pry hetym ekanomiku ZŠA.
Vy nie možacie vykinuć usie 40 miljardaŭ dalaraŭ bieź jakoha-niebudź nahladu.
Kali ŭ nas byŭ śpiecyjalny Hienieralny inśpiektar, jakoha my pryznačyli pa Afhanistanie, heta nie spyniła ŭsie rastraty, ale, prynamsi, heta prymušaje złodziejaŭ dvojčy padumać pierad kradziažom hrošaj», — skazaŭ Poł, pieraličyŭšy prablemy ZŠA z cenami na bienzin, elektraenierhiju i inflacyju.
Sienatar nastojvaje na tym, kab u zakonaprajekt byli dadadzienyja farmuloŭki, jakija ŭzmacniali b nahlad za hrašyma i zbrojaj, jakija ZŠA adpraŭlajuć va Ukrainu.
«Adpraŭka ŭzbrojenaj dapamohi Ukrainie — heta nie jakaja-niebudź dabračynnaść. Hety kanflikt maje pramyja i surjoznyja nastupstvy dla nacyjanalnaj biaśpieki», — zapiarečyŭ Połu lidar demakratyčnaj mienšaści ŭ Sienacie Mitč MakKonneł.
Sam Rend Poł u kamientaryi vydańniu The Mark Reardon Show padkreśliŭ:
«Ja simpatyzuju Ukrainie; ja žadaju im pośpiechu i chaču, kab jany pieramahli rasijan, vycisnuli ich sa svajoj krainy. Ale my taksama pavinny być zaniepakojenyja našaj dziŭnaj i dvuchsensoŭnaj inflacyjaj tut, a heta tolki pahoršyć situacyju».
Pakul što pryniaćcie rašeńnia pieranosicca jak minimum da nastupnaha tydnia.
