Chierson chočuć dałučać da Rasii navat biez refierendumu. Ukraincy kažuć, što chacieć možna — choć da Marsa
U Chiersonskaj vobłaści nie płanujuć pravodzić refierendum ab «dałučeńni» da Rasii, a chočuć aformić heta prosta praz ukaz Pucina. Aficyjnaja pazicyja Kramla niaŭciamnaja, a ŭ Kijevie kažuć, što ŭsio heta pustoje, bo ŭkraincy majuć namier nieŭzabavie vyzvalić Chierson z-pad akupacyi.
Akupacyjnyja ŭłady Chiersonskaj vobłaści źbirajucca źviarnucca da prezidenta Rasii Uładzimira Pucina z prośbaj «uklučyć» rehijon u skład Rasii, paviedamlajuć rasijskija ahienctvy sa spasyłkaj na «namieśnika kiraŭnika vajenna-cyvilnaj administracyi» Kiryła Stramavusava. Prytym nijakich refierendumaŭ rabić nie chočuć.
«Nijakich CHNR na terytoryi Chiersonskaj vobłaści stvaracca nie budzie, refierendumaŭ nie budzie. Heta budzie adzin ukaz na padstavie zvarotu kiraŭnictva Chiersonskaj vobłaści da prezidenta Rasijskaj Fiederacyi, i budzie prośba ŭvieści vobłaść u skład paŭnavartasnaha rehijona Rasijskaj Fiederacyi», — pryvodziać jaho słovy rasijskija ŚMI.
U płanach akupacyjnych uładaŭ «z nula» stvaryć piensijnuju i bankaŭskuju sistemu. «Ukrainski bok nie daść rejestr piensijanieraŭ. Vybudujem bankaŭskuju sistemu. Tady piarojdziem, kali zmožam nadzialać ludziej hramadzianstvam RF. Nikoha prymušać nie budziem», — skazaŭ Stramavusaŭ.
U svaju čarhu, pres-sakratar prezidenta Rasii Dźmitryj Piaskoŭ kazaŭ pra hetuju prablemu «abciakalna». Pavodle jaho, «rašeńnie ab zvarocie da Rasii z prośbaj pryniać Chiersonskuju vobłaść u skład RF pavinny prymać žychary hetaha rehijona». Bo, maŭlaŭ, «padobnyja losavyznačalnyja rašeńni pavinny mieć absalutna vyraznuju jurydyčnuju padaploku, abhruntavańnie, być absalutna lehitymnymi tak, jak heta było ŭ vypadku z Krymam».
U toj ža čas daradca kiraŭnika Ofisa prezidenta Ukrainy Michaił Padalak, kamientujučy žadańnie akupacyjnych uładaŭ Chiersonščyny dałučyć rehijon da Rasii, napisaŭ, što
«ŭkrainskaja armija vyzvalić Chierson, jakija b hulni słoŭ nie vystrojvali akupanty». A sami jany mohuć prasicca ab dałučeńni choć da Marsa, choć da Jupitera.
