«Heta adkaz na šantaž Rasii». Litva, Łatvija i Polšča adkryli novy hazapravod GIPL
Na ŭračystym adkryćci hazapravoda, zapusk jakoha adbyŭsia 1 traŭnia, siońnia pad Vilniaj prysutničali prezidenty Litvy, Polščy i Łatvii, a taksama jeŭrakamisar pa enierhietycy.
GIPL, jaki pavinien stać alternatyvaj «Hazpramu», złučaje sistemy transparciroŭki pryrodnaha hazu Polščy i Litvy i, jak vynik, astatnich krain Bałtyi, paviedamlaje «Svaboda».
«Heta hatovy adkaz na šantaž Rasii», — padkreśliŭ prezident Polščy Andžej Duda.
Jon adznačyŭ, što hazapravod «umacoŭvaje biaśpieku» krainy.
«My zapuskajem sumiesnuju pracu, jakaja nie źjaŭlajecca zapoźnienaj — jana svoječasovaja. Praca, jakaja nie ramantuje, a buduje, złučaje Polšču i Litvu, złučaje Jeŭropu i ŭmacoŭvaje našu biaśpieku. Ja rady, što hety interkanektar pasłužyć nam i ŭ značnaj stupieni zabiaśpiečyć dyviersifikacyju nam i inšym krainam ES», — skazaŭ Andžej Duda.
Na cyrymonii, akramia prezidentaŭ Polščy i Litvy Andžeja Dudy i Hitanasa Naŭsiedy, prysutničali prezident Łatvii Ehiłs Levits i jeŭrakamisar pa enierhietycy Kadry Simsan.
Duda padkreśliŭ, što adkryćcio hazavaha interkanektara GIPL zjaŭlajecca «bačnaj prykmietaj vydatnych polska-litoŭskich adnosin».
Dziakujučy novamu hazavamu padklučeńniu, Polšča atrymlivaje dostup da terminała LNG «Independence», jaki znachodzicca ŭ Kłajpiedzie ŭ Litvie.
Udzielnikami prajekta zjaŭlajucca polski apieratar GAZ-SYSTEM S.A. i AB Amber Grid — apieratar sistemy elektrapieradačy Litvy.
Padklučeńnie hazatranspartnych sistem było sufinansavanaje ES u pamiery amal 300 miljonaŭ jeŭra. Całkam hazapravod kaštavaŭ bolš za 500 młn jeŭra. Jon u stanie pierapampoŭvać haz ź Litvy ŭ Polšču i z Polščy ŭ Litvu. Maksimalnaja prapusknaja zdolnaść jaho składaje 2,4 młrd kubamietraŭ na hod. Praciahłaść trubapravoda — 508 km, ź ich 165 km prakładziena pa Litvie i 343 km pa Polščy.
