Hodnaje futbolnaje «kłasika»: BATE i minskaje «Dynama» zabili čatyry miačy za 15 chvilin. Adnak chto macniejšy, tak i nie vyjavili
Staličny kłub za čverć hadziny zabiŭ lidaru pieršynstva bolš, čym usie astatnija kamandy za piać papiarednich turaŭ. Adnak navat za košt dubla Ivana Bachara nie zdoleŭ nanieści barysaŭčanam pieršuju parazu ŭ siezonie.
BATE zastajecca lidaram pieršynstva, niahledziačy na ničyju ŭ «kłasika». Fota: vk.com/fcbate
Čarhovy tur u elitnym futbolnym dyvizijonie krainy źvioŭ da barjera pryncypovych apanientaŭ. Barysaŭski BATE, što z pačatku siezona vyklučna pieramahaŭ, naviedaŭsia ŭ Minsk da pieraśledvalnikaŭ z «Dynama». U pasivie haściej napiaredadni sustrečy mieŭsia tolki adziny hoł, što rabiła ich abaronu najlepšaj u krainie. Adnak trapny streł Ivana Bachara na 65-j chvilinie sapsavaŭ «žoŭta-błakitnym» statystyku dy pastaviŭ pad pahrozu pieramožnuju sieryju.
Da taho ž hoł spravakavaŭ pikavyja emocyi ŭ zaŭziataraŭ, jakich pa pratakole sabrałasia na stadyjenie na rekord siezona, ažno 10 361 hladač. Adzin ź ich nie zdoleŭ strymać pačućci ŭ sabie dy vybieh na pole, kab pavinšavać Bachara z realizavanym pienalci.
Prychilnik minskaha «Dynama» vinšuje z realizavanym pienalci Ivana Bachara. Fota: skrynšot tranślacyi abff.by
Tym nie mienš BATE jak sapraŭdny lidar pieršynstva ŭdar vytrymaŭ hodna. I spačatku nahami eks-dynamaŭca Drahuna adnaviŭ raŭnavahu, a paśla i ŭvohule pierachapiŭ inicyjatyvu za košt šykoŭnaha strełu Filipaviča zdalok.
Barysavu paśla hetaha zastavałasia pratrymacca 12 chvilin, kab zafiksavać valavuju viktoryju — tryvańnia chapiła tolki na dźvie. Usio toj ža Bachar paśpieŭ na dabivańnie dy vyratavaŭ «Dynama», zafiksavaŭšy vynikovy lik 2:2.
Ničyja dazvoliła ŭskaraskacca na druhi radok tablicy «Enierhietyku». Minčanie stali hałoŭnym pieraśledvalnikam BATE za košt fiejeryčnaj hulni Abdzichalikava ŭ Hrodnie: uźbiekski forvard adkryŭ lik chiet-trykam pieršynstva dy staŭ hałoŭnym inicyjataram razhromu «Niomana».
Pazityŭnaha vyniku damohsia i «Šachcior», jaki aformiŭ pieršuju pieramohu na čale ź Siarhiejem Tašujevym. Čempijon da 93-j chviliny zmahaŭsia z tryvałaj abaronaj «Homiela» — i tolki za košt hoła ź pienalci Darba zdoleŭ zvajavać try ački.
A voś žodzinskaje «Tarpieda» paciarpieła čarhovuju parazu — hetym razam ad «Biełšyny». Lik 1:3 u matčy z kamandaj, što tolki-tolki viarnułasia ŭ elitu ź pieršaha dyvizijonu, vyhladaŭ sapraŭdnym prysudam nie tolki «aŭtazavodcam», ale i hałoŭnamu trenieru.
Jak vynik, u najbližejšyja hadziny čakajecca zvalnieńnie Dźmitryja Mołaša z pasady — vakansiju ŭžo hatovy zaniać Ivan Bijončyk. Toj, što sam pratrymaŭsia na čale «Šachciora» tolki try tury dy pieršym u siezonie zastaŭsia biez pracy.
Paśla šaści turaŭ BATE z 16 ačkami zachavaŭ lidarstva, na try bały mienš u «Enierhietyka», na čatyry — u minskaha «Dynama».