U Bučy pamierła viadomaja mastačka-šaścidziasiatnica, jakoj padčas akupacyi daviałosia haładać
Mer Bučy Anatol Fiedaruk paviedamiŭ, što na 85-m hodzie žyćcia pamierła viadomaja ŭ Ukrainie mastačka-šaścidziasiatnica Luboŭ Pančanka. U časy akupacyi Bučy jana zastavałasia ŭ horadzie i mocna haładała.
Mer horada paviedamiŭ:
«Adyšła ŭ viečnaść hanarovaja hramadzianka horada, łaŭreatka premii imia Vasila Stusa, mastačka-madeljerka Luboŭ Pančanka. Jana — z asiarodku patryjotaŭ-šaścidziasiatnikaŭ, jakija, niahledziačy na cisk Kramla, raźvivali ŭkrainskuju kulturu ŭ časy savieckaj cenzury. Usia jaje tvorčaść mieła jarka vyražany ŭkrainski kałaryt, z-za čaho Luboŭ Michajłaŭnu pieraśledavali, a jaje tvorčaść zamoŭčvali.
Luboŭ Pančanka nie zmahli złamać u KHB, ale mastačka vielmi paciarpieła padčas novaha rasijskaha našeścia».
Žurnalisty raniej paviedamlali, što Pančanka, źniasilenaja doŭhim haładańniem u akupavanaj Bučy, trapiła ŭ balnicu. Jana była lažačaja i mieła patrebu ŭ pastajannym dohladzie.
Pančanka ŭ 1960-ja hady była adnoj z pradstaŭnikoŭ novaha ŭkrainskaha mastactva, jakija vykarystoŭvali ŭ svaich pracach nacyjanalnyja matyvy. Jana stvarała jak hrafičnyja i žyvapisnyja raboty, tak i madeli adzieńnia dy arnamientalnaj vyšyŭki, jakija drukavalisia ŭ papularnych u tyja časy časopisach dla žančyn.