Łaŭroŭ nazvaŭ umovu dla razryvu adnosin z Zachadam
Mahčymy razryŭ adnosin nie ŭ intaresach Maskvy abo samoha Zachadu, zajaviŭ kiraŭnik MZS Rasii Siarhiej Łaŭroŭ u intervju rasijskim žurnalistam. Adnak jon mahčymy ŭ tym vypadku, kali suprać Rasii budzie pryniaty samy žorstki sankcyjny pakiet, jaki ŭklučaje adklučeńnie ad sistemy SWIFT, zajaviŭ Łaŭroŭ.
Fota RBK
«Što tyčycca pahroz uviadzieńnia sankcyj, amierykancam skazana było, što voś toj pakiet, jaki supravadžajecca poŭnym adklučeńniem ad finansava-ekanamičnych sistem, jakija kantralujucca Zachadam, budzie ekvivalentny razryvu stasunkaŭ. Nie dumaju, što heta u čyich-niebudź intaresach», — cytuje kiraŭnika MZS Rasii RBK.
Pry hetym jon padkreśliŭ, što pravał pieramovaŭ pryviadzie da «mieraŭ u adkaz». «Kali našy sproby damovicca ab uzajemaprymalnych pryncypach harantavańnia biaśpieki ŭ Jeŭropie nie daduć vyniku, tady my budziem prymać miery ŭ adkaz», — skazaŭ jon.
Łaŭroŭ nahadaŭ pra słovy Uładzimira Pucina ab tym, što hetyja miery mohuć być samymi roznymi, i ab tym, što prezident paabiacaŭ prymać rašeńni, zychodziačy z prapanoŭ, jakija pradstaviać vajennyja.
Adklučeńnie Rasii ad sistemy mižbankaŭskaha abmienu infarmacyjaj SWIFT praduhledžvałasia ŭ samych žorstkich varyjantach sankcyj, jakija Zachad pahražaje ŭvieści ŭ vypadku razryvu stasunkaŭ z Rasijaj. Jano było prapisanaje ŭ Sienackim zakonaprajekcie demakrataŭ, zakonaprajekcie respublikanca Marka Rubia i inšych. Pakul ni adzin ź ich nie vyjšaŭ na etap razhladu pałatami Kanhresa ZŠA.
Čytajcie taksama:
ZŠA pryhrazili «tak ci inakš» spynić Nord Stream 2 z-za Ukrainy
