Palitźniavolenaja pa «spravie studentaŭ» vyjšła zamuž u kałonii. Muž uziaŭ jaje proźvišča
Byłaja studentka piedahihičnaha ŭniviersiteta Jana Arabiejka asudžanaja za ŭdzieł u akcyjach pratestu na 2,5 hoda. Zatrymali jaje razam ź inšymi studentami vosieńniu 2020-ha. Siomy miesiac dziaŭčyna znachodzicca ŭ žanočaj kałonii ŭ Homieli. 27 studzienia stała viadoma, što jana zmahła zaklučyć šlub z chłopcam, jaki ŭvieś čas padtrymlivaŭ jaje — pisaŭ listy, nasiŭ pieradačy ŭ SIZA, a ciapier vozić i ŭ kałonii. Ciapier, kali jany aficyjna stali siamjoj, u ich źjaviłasia prava na spatkańni.
«Darahija padpisčyki, adbyŭsia šlub», — napisaŭ na svajoj staroncy ŭ Facebook Valery Tamilin i vykłaŭ śviatočny fotazdymak.
Fota: Facebook Valera Tamilina
Užo potym chłopiec padzialiŭsia fota paśviedčańnia, u jakim adznačana, što jaho proźvišča paśla šluba budzie taksama Arabiejka.
Fota: «Radyjo Svaboda»
Valera Tamilin i studentka BDPU Jana Arabiejka, adna ź fihurantak «spravy studentaŭ», paznajomilisia letam 2020-ha. Spačatku ŭźnikła simpatyja, ale ŭvosień jany pierastali kantaktavać. 12 listapada — u dzień aryštu — dziaŭčyna paśpieła napisać Valery: «Mnie budzie spakajniej, kali ty praciahnieš mnie pisać».
Uvieś čas, pakul Jana za kratami, Valera piša joj listy i adpraŭlaje pieradačy. Pabracca šlubam jany vyrašyli daŭno, ale była prablema z tym, što zhubiŭsia pašpart dziaŭčyny. I voś, 27 studzienia, chłopiec napisaŭ na svajoj staroncy ŭ adnoj z sacsietak, što jany zmahli raśpisacca. Sumiesnaha fota niama, nijakaj zdymki ŭ kałonii być nie moža.
«Jana pryniała ŭsio jak jość: cudu nie adbudziecca, i treba niejak žyć, — raskazvaŭ Valeryj. — U SIZA na pačatku ŭ jaje była prablema z kamunikacyjaj. Vielmi mocna źmianiłasia koła. Adna sprava — z adnahrupnikami i siabrami sa škoły kamunikavać, inšaja — z darosłymi ludźmi, jakija šmat što prajšli. Jana pastaleła za hety hod. Vielmi važna, što jana adčuvała, što nie adna, što my jaje padtrymlivajem. Navat kali listy zusim nie dachodzili, my ŭsio adno staralisia pakazać, što my nie zabylisia pra jaje — rabili pieradačy kožnuju sieradu i subotu».
U listach z kałonii dziaŭčyna prasiła nie vypisvać joj haziet, bo ich vykidvajuć. U jaje była kamisija pa ŭmoŭna-daterminovym vyzvaleńni — pakarańnie pakinuli bieź źmienaŭ.
Jana Arabiejka — aktyvistka «Zadzinočańnia biełaruskich studentaŭ», vučyłasia ŭ Biełaruskim dziaržaŭnym piedahahičnym univiersitecie. Jana była zatrymanaja ŭ internacie 12 listapada 2020 hoda ŭ miežach kryminalnaj spravy pa č. 1 art. 342 KK (arhanizacyja albo ŭdzieł u hrupavych dziejańniach, jakija hruba parušajuć hramadski paradak). Spačatku dziaŭčynu źmiaścili pad vartu ŭ SIZA KDB, zatym pieraviali ŭ izalatar na Vaładarskaha.
Sud pa spravie prachodziŭ letam 2021 hoda, fihurantami byli 12 čałaviek — studenty, vypusknica VNU i adna vykładčyca. Abvinavačanyja, pa viersii śledstva, raspracavali płan pa pryciahnieńni ŭ pratesnuju aktyŭnaść studentaŭ i supracoŭnikaŭ VNU. Niekatoryja ź ich byli ŭdzielnikami, a niekatoryja — administratarami čataŭ u mesendžarach, dzie abmiarkoŭvałasia miesca i čas praviadzieńnia akcyj. Takija dziejańni, adznačana ŭ abvinavačvańni, pryviali da parušeńnia «narmalnaj pracy ŭstanoŭ adukacyi».
U vyniku vinu pryznaŭ tolki adzin fihurant, Hleb Ficnier, jon atrymaŭ 2 hady pazbaŭleńnia voli. Astatnija fihuranty, u tym liku Jana Arabiejka — 2,5 hoda źniavoleńnia. Prysud byŭ ahučany ŭ lipieni. Z ulikam utrymańnia pad vartaj bolšaści fihurantaŭ zastavałasia adbyć termin u hod i try miesiacy.
«Ja vaźmu jaje proźvišča». Chłopiec siomy miesiac nosić pieradačy kachanaj dziaŭčynie i choča ažanicca
«Praz žoŭtyja birki na adzieńni palityčnych nazyvajuć «kuraniatami». Jak žyvuć u kałonijach asudžanyja pa «spravie studentaŭ»
