Pastaŭščyki skardziacca na toje, što «Vitalur» nie płacić pa kantraktach: tolki ŭ sudzie daŭhoŭ na try miljony rubloŭ. Što adbyvajecca?
Pastaŭščyki tavaraŭ u sietku «Vitalur» sihnalizujuć «Našaj Nivie» ab prablemach z raźlikami z boku kampanii. «Nam vinnyja 350 tysiač rubloŭ, u sud pakul nie padavali, spadziajemsia vyrašyć mirna», — piša nam adzin pastaŭšyk. «A nam pavinny 70 tysiač, taksama ŭ sud pakul nie chadzili», — kaža druhi. Miarkujučy pa tym, što mnohija ŭ sud nie źviartajucca, ciažka budzie acanić realnyja masštaby niavypłat. Ale ŭ bazach pravierki kontrahientaŭ bačna, što tolki praz sud, u aficyjnym paradku, 38 kampanij spahaniajuć z «Vitalura» ahułam kala troch miljonaŭ rubloŭ.
Fota: vitalur.by
Rytejłavaja sietka vinnaja Minskamu zavodu ihrystych vin, handlovamu domu «Krykova», «Małočnamu śvietu», elektramantažnikam z «Brabasa», i navat arhanizacyi, jakaja pastaŭlaje kasavyja stužki.
Finansavaje stanovišča kampanii pa vynikach 2021 hoda pakul nieviadomaje. U samim «Vitalury», kudy źviarnułasia «Naša Niva», adkazali, što apublikujuć buchhałtarski bałans naprykancy sakavika 2022-ha.
Pry hetym viadoma, što 2020 hod kampanija skončyła biazradasna — sa stratami ŭ 25 miljonaŭ, na fonie prybytku ŭ amal 13 miljonaŭ u 2019-m.
Sa śviežych dakumientaŭ u siecivie možna znajści tolki dekłaracyju ab raźmiaščeńni tokienaŭ, u jakoj jość niekatoraja infarmacyja ab ekanamičnych pakazčykach, jana mahła b dazvolić patencyjnym inviestaram zrabić vysnovy ab stanie kampanii.
Padpisany dakumient u 2022-m hodzie, ale nijakich vysnovaŭ ab realnaj situacyi ŭ 2021-m ź jaho zrabić nielha praz razmytuju prypisku «prahnazavanyja značeńni ŭ adpaviednaści z płanami raźvićcia».
Tak kampanija płanavała vyručyć 995 miljonaŭ rubloŭ i naraścić 25,2% handlovych płoščaŭ.
Ale ŭ hrafiku, jaki pradastaŭleny inviestaram, jość uzajemavyklučeńni: pryrost vyručki byŭ zapłanavany na 14% (ź ich 10% źjeła b inflacyja), a pryrost handlovych płoščaŭ na 25%.
Z hetaj łohiki vynikała b, što vyručka z 1 kv.m. źniziłasia b, ale ŭ tablicy jana pavialičyłasia. Pamyłka?
Takija niesupadzieńni ŭ spravazdačnaści pałochajuć pastaŭščykoŭ, a dalej jany, hruntujucca na čutkach, jakija, nie vyklučana, sami i naradžajuć. Maŭlaŭ, «Vitalur» admaŭlajucca kredytavać banki. Ci tak heta — nieviadoma. Nam nie ŭdałosia źviazacca sa śpiecyjalistami kampanii, jakija adkazvajuć za kantakty z presaj.
«Hrošy, jakija pavinny pajści na apłatu niekatorym pastaŭščykam, vykarystoŭvajucca jak biaspłatny kredyt»
Ale my znajšli ludziej, abaznanych u spravie hetaha «rybnaha» rytejłu, i jany patłumačyli, što tam adbyvajecca.
«U «Vitalura» vielmi prostaja chvaroba — pierainviestycyi ŭ nieruchomaść, — kaža naš surazmoŭca. — I jany nie mohuć spynicca, niahledziačy na toje, što mocna zakredytavanyja i kiepska płaciać pastaŭščykam (praz toje, što ŭsiu abarotku ŭkłali ŭ mietry). Viadoma, što niadaŭna jany padpisali kantrakt z «Danaj Chołdynhz» na zakupku płoščaŭ dla kram.
Takaja skvapnaść moža zahubić, asabliva kali zdarycca šok i rubl devalvujecca. A kali šoku nie budzie, to na kolki chopić ciarpieńnia ŭ bankaŭ i pastaŭščykoŭ? Nu abo kali znojduć doŭhija niedarahija hrošy?»
Fota: onliner.by
Inšy čałaviek, blizki da hetaj kampanii, patłumačyŭ, što na fonie niavyhadnych bankaŭskich umovaŭ i spynieńnia praktyk kredytavańnia vialikaj nieruchomaści kampanija karystajecca ŭ cełym choć i niepryhožaj, ale dziejnaj stratehijaj.
«Hrošy, jakija pavinny pajści na apłatu niekatorym pastaŭščykam, vykarystoŭvajucca jak biaspłatny kredyt — ty imi karystaješsia i nie płaciš pracenty, — patłumačyŭ inšy abaznany. — Tak, pastaŭščyk niezadavoleny terminami apłaty, jakija mohuć siahać niekalkich miesiacaŭ zvyš damoŭlenaha.
Nu, ale nie ŭsie pojduć u sud z-za praterminoŭki, viedajučy čarhu na raźlik, a buduć sprabavać damovicca kułuarna, kab vypłata adbyłasia. I jana, chutčej za ŭsio, adbudziecca, prosta kali hetymi hrašyma ŭžo pakarystajucca. Heta toje, jak ja heta baču, viedajučy praktyku dziejańniaŭ u hetaj śfiery».
Čytajcie taksama: Zharnuli inšyja źnižki dla piensijanieraŭ. Jak handlovyja sietki ŭvodziać sacyjalny dyskont
