Dziaržaŭnaja hazieta raźmieściła tendar na kuplu aŭto. Vyhladaje tak, što zajaŭka napisana pad kankretny krasovier
Redakcyja «Homielskaj praŭdy» raźmiaściła tendar na zakup aŭtamabila koštam «nie bolej čym za 25 tysiač jeŭra». Techničnyja charaktarastyki, jakija zaznačanyja ŭ zajaŭkie, «viaduć» da kankretnaha krasoviera Volkswagen. Na tendar źviarnuła ŭvahu homielskaje vydańnie «Fłahštok».
Zakazčyk šukaje aŭtamabil z prabieham, vypuščany nie raniej za 2021 hod. Aryjentavany košt — 73 tysiačy biełaruskich rubloŭ, ale nie bolej čym 25 tysiač jeŭra. Krynica finansavańnia — ułasnyja srodki.
Najbolšuju cikavaść vyklikaje techničnaja zajaŭka. U joj paznačanyja bolš za tryccać charaktarystyk, jakim pavinien adpaviadać aŭtamabil.
Naprykład, kruiz-kantrol i datčyki parkoŭki. Heta całkam zvyčajnaje pažadańnie, takija opcyi prysutničajuć u mnohich sučasnych madelach.
Ale try paramietry, paznačanyja ŭ zajaŭcy, — piaredni pryvad, 8-AKP i rejlinhi — istotna zvužajuć pošuk. Adpaviadajuć hetym charaktarystykam tolki dva krasoviery, jakija byli aficyjna pradstaŭleny na rynku Biełarusi — Skoda Karoq i Volkswagen Taos.
Adnak z-za kontrsankcyjaŭ aŭtamabili Skoda zabaroniena ŭvozić u Biełaruś. Dyler nie moža ich pradavać.
To-bok pošuk zvužajecca da Volkswagen Taos. I heta možna było b ličyć supadzieńniem, kali b nie jašče dźvie akaličnaści. U zajaŭcy paznačanyja taksama koler pažadanaha aŭtamabila (mietalik) i prabieh (nie bolš za 3700 km). Vyhladaje, što dakumient pisaŭsia pad kankretny ekzemplar.
«Hledziačy pa danych toj ža elektronaj placoŭcy, hałoŭny redaktar addaje pieravahu Volkswagen, — zaŭvažaje «Fłahštok». — U 2015 hodzie ŭ jakaści słužbovaha transpartu byli nabytyja Volkswagen T6 i Volkswagen Passat».
