MZS Biełarusi: Davać spravazdaču ZŠA my nie abaviazanyja i nie źbirajemsia
Pres-sakratar Anatol Hłaz adkazaŭ na pytańnie, ci moža Ukraina być atakavanaja ź Biełarusi i ci moža źmianieńnie Kanstytucyi pryvieści da raźmiaščeńnia ŭ Biełarusi jadziernych sił Rasii. Takija abvinavačvańni prahučali z boku nienazvanaha vysokapastaŭlenaha pradstaŭnika Dziarždepartamienta ZŠA.
Anatol Hłaz. Fota: MZS Biełarusi / Facebook
Sa spasyłkaj na rasijskich kaleh Hłaz nazvaŭ heta dezinfarmacyjaj, a ad siabie dadaŭ: «Dziŭny nabor fantazij i strašyłak».
«Amierykanski bok na sistemnaj asnovie ŭ apošnija tydni roznymi sposabami ŭkidvaje chłuśniu ŭ infarmacyjnuju prastoru. Całkam jasna, što jon heta robić dla nahniatańnia abstanoŭki, uniasieńnia napružanaści ŭ tym liku tudy, dzie jaje niama. Standartnaja taktyka. Heta treba ZŠA dla apraŭdańnia šerahu svaich niezakonnych dziejańniaŭ i revanšu za ŭsie adkrytyja pravały apošniaha času. Niezrazumieła tolki, čamu jany ličać usich vakoł durniejšymi siabie i raźličvajuć, što hetyja zajezdžanyja pryjomy znoŭ projduć», — zajaviŭ Hłaz.
Pavodle jaho, napad na Ukrainu z poŭnačy — heta mif, «hety fejk paŭtarajecca z hoda ŭ hod». «Heta poŭnaja duraść», — adkazaŭ Hłaz u styli rasijskaj dypłamatyi.
«My nieadnarazova naŭprost kazali, što z našaj terytoryi nikoli nie budzie zychodzić pahroza, ciapier hetaja norma ŭniesienaja ŭžo navat u prajekt Kanstytucyi. Kudy ŭžo pradmietniej?» — dadaŭ jon.
Krynicaj destabilizacyi abstanoŭki ŭ rehijonie, ličyć Hłaz, źjaŭlajecca nie Biełaruś ci Rasija, a «pastajannaje i nieabhruntavanaje naroščvańnie zamiežnaj vajskovaj prysutnaści pa pierymietry našych miežaŭ».
Hłaz zakinuŭ «kalektyŭnamu Zachadu» toje, što toj nie vykonvaje Budapiešcki miemarandum, «pramyja abaviazacielstvy, pad jakimi sami ž pastavili podpisy».
Pry hetym, pavodle pres-sakratara MZS, amierykanskija kalehi zakłapacilisia «patencyjnym raźmiaščeńniem uzbrojenych sił i jadziernaj zbroi na terytoryi našaj krainy».
Adkaz Hłaza na hetaje abvinavačvańnie hučaŭ dvuchsensoŭna: «Kali ja nie pamylajusia, to mienavita ZŠA i ES u apošni čas zaŭziata adstojvajuć śviatoje prava kožnaj dziaržavy samastojna vyznačać, z kim i ŭ jakija abjadnańni abo sajuzy ŭstupać. Ci heta pra inšaje?» Možna heta zrazumieć i jak toje, što Biełaruś sama vyrašyć, raźmiaščać ci nie ŭ siabie jadziernuju zbroju.
«Tak što davać spravazdaču ZŠA my nie abaviazanyja i nie źbirajemsia. Kali što-niebudź vyklikaje tryvohu — my zaŭsiody hatovyja heta cyvilizavana abmierkavać. Dypłamatyčnaja prysutnaść jość u abiedźviuch krainach», — reziumavaŭ Hłaz.
Dziarždep: Dla Alaksandra Łukašenki nadyšoŭ «momant, kali treba vyrašać»
ZŠA papiaredžvajuć Biełaruś: vajna suprać Ukrainy moža stać kancom režymu Łukašenki
