Ukraina adharodžvajecca ad Biełarusi kalučym drotam
Z-za mihracyjnaha kryzisu na miažy Biełarusi i krain Jeŭraźviaza, jaki da kanca pakul tak i nie vyrašany, Ukraina istotna aktyvizavała ŭładkavańnie paŭnočnaha ŭčastka svajoj miažy, paviedamlaje Dziaržaŭnaja pamiežnaja słužba Ukrainy.
Fota: dpsu.gov.ua
Jašče z pačatku listapada na ŭkrainska-biełaruskaj miažy pastajanna pracujuć kala troch dziasiatkaŭ inžyniernych hrup pamiežnikaŭ. Jany staviać roznaha kštałtu zaharody — z kalučaha drotu, sietki rabicy i inšych materyjałaŭ.
Taksama inžyniernyja hrupy pracujuć nad uparadkavańniem viertalotnych placovak, kab zabiaśpiečyć apieratyŭnaje pierakidańnie reziervaŭ u vypadku rezkaj źmieny stanovišča na peŭnym učastku.
U Čarkaskaj vobłaści ŭkrainskimi pamiežnikami razhornutaja navat ułasnaja vytvorčaść, jakaja dazvalaje vyrablać drot i sietki. Užo siońnia pamiežniki zdolnyja samastojna vyrablać kožnyja sutki stolki materyjałaŭ, kab mahčy štodzień zaharodžvać pa try kiłamietry miažy.
Zhodna z rasparadžeńniem urada «ab vydzialeńni srodkaŭ dla ažyćciaŭleńnia mierapryjemstvaŭ, źviazanych z umacavańniem abaranazdolnaści dziaržavy» Dziaržaŭnaj pamiežnaj słužbie Ukrainy vydzielena 21 młn hryŭniaŭ (amal 800 tysiač dalaraŭ). Heta dazvoliła zakupić amal 300 ton syraviny, ź jakoj vyrabiać aharodžu dla inžyniernaha pierakryćcia kala 62 km ukrainska-biełaruskaj miažy.
