Turfirma, jakaja trapiła pad sankcyi, patracić 230 tysiač dołaraŭ ź biudžetu na rekłamu svaich pasłuh
Turfirma «CentrKurort», jakaja naležyć kiraŭnictvu spraŭ Łukašenki, patracić bolš za 230 tysiač dołaraŭ na rekłamu svaich pasłuh, hrošy vydzielać ź biudžetu i dziaržaŭnych pazabiudžetnych fondaŭ. U vyniku mihranckaha kryzisu na miažy z krainami ES kampanija trapiła pad sankcyi. U Jeŭrapiejskim sajuzie ličać, što «Centrkurort» maje dačynieńnie da arhanizacyi nielehalnaha trafiku. Kiraŭnictva kampanii admaŭlała abvinavačvańni.
Fota toursoyuz.by
«CentrKurort» pracuje bolš za 18 hadoŭ. Heta adna z najbujniejšych turystyčnych kampanij u Biełarusi, arhanizuje i zamiežnyja tury, ale najbolš śpiecyjalizujecca na pryciahnieńni turystaŭ z-za miažy ŭ Biełaruś, adzin z asnoŭnych kirunkaŭ — prodaž puciovak u sanatoryi, u tym liku ŭ biełaruskija sanatoryi, što znachodziacca za miažoj. Kampanija ŭvachodzić u strukturu kiraŭnictva spravami Łukašenki. U śniežni 2021 hoda ES pryniaŭ piaty pakiet sankcyj, u śpisie źjaviłasia i hetaja turfirma.
Za što kampanija «CentrKurort» trapiła pad sankcyi?
U ES miarkujuć, što heta dziaržaŭnaja firma źviazanaja z arhanizacyjaj nielehalnaha trafiku mihrantaŭ.
Letam 2021 hoda centr «Daśje» i Der Spiegel apublikavali rasśledavańnie, u jakim śćviardžali, što «CentrKurort» kaardynuje patok nielehalnych mihrantaŭ. U rasparadžeńni žurnalistaŭ apynulisia dakumienty, ź jakich vynikaje, što ŭ pačatku maja 2021 hoda «CentrKurort» zaklučyŭ damovu ab supracoŭnictvie «ŭ raźvićci mižnarodnaha turyzmu pamiž krainami arabskaha śvietu i Respublikaj Biełaruś» ź biełaruskaj turystyčnaj kampanijaj «Oskartur». Jaje ŭznačalvajeSałach Muchejmien Al-Asadzi.
Nieŭzabavie «Oskartur» staŭ spravazdačycca pierad «CentrKurortam» ab kantaktach z avijakampanijaj Fly Baghdad, a praź niekalki tydniaŭ paśla hetaha irakski pieravozčyk zapuściŭ rehularnyja rejsy ŭ Minsk. Akramia taho, «Oskartur» źviarnuŭsia ŭ «CentrKurort» z prośbaj dapamahčy atrymać vizy 51 hramadzianinu Iraka, choć vydačaj viz zajmajecca Ministerstva zamiežnych spraŭ, a nie Kiraŭnictva spraŭ prezidenta.
U adnym z vypadkaŭ «Oskartur» paprasiŭ «CentrKurort» dapamahčy z afarmleńniem vizy irakcu pa imieni Machamied Nasier Ałvan Okbi, jakomu raniej turystyčnaja kampanija prapanavała kantrakt na markietynhavyja pasłuhi, a kopiju kantrakta adpraviła ŭ «CentrKurort».
Paśla ŭ «CentrKurort» pa vizy dla 10 hramadzian Iraka źviarnułasia jašče adna biełaruskaja kampanija — «Bierahavaja zorka». Z dakumientaŭ vynikaje, što praz prezidencki «CentrKurort» prajšło bolš za 200 zajavak na vizy dla irakskich hramadzian. Metaj pryjezdu amal usich «turystaŭ», u tym liku dziaciej, było paznačana «praviadzieńnie palaŭničych turaŭ».
U niekatorych zajaŭkach na vizy taksama ŭkazvalisia haścinicy raźmiaščeńnia — «Minsk» i «Biełaruś», jakija papularnyja siarod irakskich «turystaŭ».
U hrupach, pryśviečanych pajezdcy ź Iraka ŭ Jeŭropu praź Biełaruś, sami irakcy pišuć, što ŭ hatelach nie zatrymlivajucca: zvyčajna jany pravodziać tam paru načej, a paśla jeduć da pamiežnaha punkta «Bieniakoni» i sprabujuć pieraleźci praz paŭtaramietrovy płot, jaki adździalaje Biełaruś ad Litvy. Kali pašancavała, pierad mihrantami adkryvajucca ŭsie dźviery ŭ Jeŭropu: miežy pamiž krainami Jeŭrasajuza praktyčna nie achoŭvajucca.
Fota Delfi.lt
U dadatak «CentrKurort» zaklučyŭ damovu na akazańnie transpartnych pasłuh ź biełaruskaj kampanijaj «Strojtur», jakaja prapanuje arendu aŭtobusaŭ z kiroŭcami. U dalejšym hetaja firma vystaŭlała «CentrKurortu» rachunki za akazańnie transpartnych pasłuh pa maršrucie Minsk — Aeraport Minska — Minsk. Pajezdki prachodzili jak minimum trojčy: 14, 15 i 21 maja.
Praktyčna va ŭsich zapytach na vizy dla irakcaŭ zhadvajucca dźvie kantaktnyja asoby z «CentrKurorta» i «Oskartura». Der Spiegel udałosia parazmaŭlać z byłym supracoŭnikam «CentrKurorta», čyjo imia sustrakajecca ŭ zapytach. Jon paprasiŭ nie raskryvać svaju asobu, ale paćvierdziŭ sapraŭdnaść dakumientaŭ. Pavodle jaho słoŭ, «CentrKurort», jaki naležyć Kiraŭnictvu spravami prezidenta, dapamoh atrymać vizy sotniam hramadzian Iraka. U zonie prylotu «turystaŭ» čakali zakazanyja «CentrKurortam» aŭtobusy, jakija razvozili ich pa hatelach u centry Minska.
«Mnie chutka stała jasna, što heta nie turystyčnyja pajezdki, — kaža eks-supracoŭnik turfirmy. — Ja zrazumieŭ, što heta ŭsio niezakonna, i zvolniŭsia ŭ kancy traŭnia».
Dyrektar «CentrKurorta» Natalla Jarmak paviedamiła Der Spiegel, što «pradpryjemstva nie pracuje pa zaprašeńniach u Respubliku Biełaruś haściej ź Iraka, Siryi, Livii, Afhanistana». Kali žurnalist Der Spiegel zadaŭ pytańnie dyrektaru «Oskartura» ab ich supracoŭnictvie z «CentrKurortam», Sałach Muchejmien Al-Asad paviesiŭ trubku.
Na što pojduć sotni tysiač dołaraŭ ź biudžetu?
Apublikavany płan zakupak «CentrKurorta» na 2022 hod. Niekalki hod tamu kampanija zapuściła partał VETLIVA.ru, dzie možna zamović adpačynak u Biełarusi. Na rekłamu sajta ŭ bartavym časopisie «Biełavii» vydzialać 25 tysiač rubloŭ, jašče 31 tysiaču na rekłamu ŭ mietro, takuju ž sumu na suvienirnuju pradukcyju VETLIVA, 20 tysiač na rekłamu ŭ maršrutkach, samaja vialikaja suma (bolš za 264 tysiačy) — na raskrutku partała anłajn, jašče 80 tysiač na abnaŭleńnie sajta, bolš za 8 tysiač rekłamu sajta ŭ videafilmach, 9 tysiač na rekłamu partała ŭ prahramach telekanała ANT.
Dadatkova ź biudžeta i dziaržaŭnych pa-za biudžetnych fondaŭ vydzialać 31 tysiaču rubloŭ na rekłamu «CentrKurorta» na biłbordach, rekłama na telekanale ANT kaštuje 31 tysiaču rubloŭ, 30 tysiač zapłaciać za rekłamu na ekranach u handlovych centrach, a rekłama na radyjo «Junistar» i «Ruskim radyjo» paciahnie na 70 tysiač rubloŭ.
Takim čynam, ahułam vychodzić amal 600 tysiač rubloŭ, heta bolš za 230 tysiačy dołaraŭ pa siońniašnim kursie. Ahułam pa płanie zakupak «CentrKurort» na 2022 hod hatovy vydatkavać 690,5 tysiač rubloŭ, tak što asnoŭnyja ŭkładańni ź biudžetu pojduć na rekłamu.
Rasśledavańnie: turfirma Kiraŭnictva spravami prezidenta moža być źviazanaja z kantrabandaj mihrantaŭ
«Cikavaja historyja, šmat u čym nie źviazanaja z Rasijaj»: jak prydziaržaŭnaja struktura rekłamuje krainu za miažoj
Sanatoryj «Biełaruś» u Litvie znoŭ pracuje. Ale biełarusy tam adpačyvać pakul nie mohuć
