Piensijanierku aryštavali na 8 sutak za toje, što doŭha nie adčyniała dźviery siłavikam
Ranicaj 1 śniežnia da 59-hadovaj piensijanierki Niny Masłoŭskaj pryjšli supracoŭniki DFR. U kvatery žančyny praviali pieratrus, a jaje pavieźli na dopyt ŭ viedamstva, paśla jakoha na volu jana ŭžo nie vyjšła. Masłoŭskuju dastavili ŭ Pieršamajski RUUS i pakinuli tam na noč da suda. 2 śniežnia ŭ sudzie Pieršamajskaha rajona adbyłosia pasiadžeńnie. Spravu piensijanierki razhladała sudździa Anastasija Kulik, paviedamlajuć pravaabaroncy.
Pratakoł pa art. 24.3 KaAP na Masłoŭskuju skłali nibyta za admovu adčynić dźviery dla praviadzieńnia vobšuku. Vinu svaju Nina nie pryznała. Jana rastłumačyła, što a 7 ranicy jaje razbudziŭ zvanok u dźviery. Kab adčynić ich, joj było nieabchodna apranucca, tamu dla hetaha joj spatrebiłasia kala piaci chvilin. Paśla hetaha jana adrazu adčyniła dźviery supracoŭnikam milicyi.
Sudździa Kulik aburyłasia tamu faktu, što Nina adčyniła nie adrazu:
— Čamu vy nie padyšli i nie zapytali, chto vam zvonić u dźviery? Čamu adrazu nie adčynili? Vam jość čaho bajacca?
Viadoma, što pieratrus pravodzili čatyry supracoŭnika milicyi. Pa słovach Masłoŭskaj, nichto ź siłavikoŭ nie prasiŭ adčynić dźviery i nie ahučyli, što hrukajecca mienavita milicyja.
Śviedki-milicyjanty na sudzie śćviardžali, što jany nieadnarazova prasili Masłoŭskuju adčynić i pakazvali joj pastanovu na pieratrus. Taksama jany kazali, što nibyta Nina zajaviła im ab tym, što «nie budzie adčyniać dźviery». Na ich dumku, u kvateru piensijanierka puściła tolki praz 20 chvilin.
Masłoŭskaja ličyć heta chłuśnioj. Žančyna paprasiła źniać adnaho sa śviedak masku, kab jaho apaznać, ale sudździa nahadała, što śviedka zasakrečany. Taksama adzin ź siłavikoŭ zajaviŭ, što nie pamiataje, jak vyhladaje kvatera žančyny, bo «pravodziŭ u toj dzień bolš za piać pieratrusaŭ».
Piensijanierka na sudzie dadała, što ŭ jaje cystyt i vysoki cisk, tamu paprasiła pieradać tabletki, ale viadoma, što ŭ RUUSie paśla suda ich nie pryniali ad svajakoŭ.
Sudździa Anastasija Kulik pryznała Ninu vinavataj i pakarała jaje 8-sutačnym aryštam.
