Hałoŭčanka paabiacaŭ sankcyi suprać Zachadu
Biełaruś u najbližejšyja dni prymie pakiet ekanamičnych sankcyj suprać Zachadu. Ab hetym siońnia zajaviŭ žurnalistam premjer-ministr Raman Hałoŭčanka paśla narady ŭ Łukašenki, paviedamlaje BiełTA.
Kiraŭnik urada raspavioŭ, što na naradzie ŭ tym liku było abmierkavanaje niadaŭniaje pryniaćcie zachodnimi krainami čarhovaha pakieta sankcyj u dačynieńni da Biełarusi. Jon adznačyŭ: biełaruski bok nieadnarazova papiaredžvaŭ partnioraŭ, što hetaha rabić nie varta. «Pa-pieršaje, heta nielehitymna. Pa-druhoje, ad hetaha pakutujuć hramadzianie, pra jakich jany nibyta dbajuć, pradpryjemstvy. Ale tym nie mienš hetyja rašeńni pryniatyja», — kanstatavaŭ Raman Hałoŭčanka.
Biełaruś niekalki razoŭ adkładała pryniaćcie žorstkich mier u adkaz, raźličvajučy na razvažlivaść inšaha boku. «Jano nie było zroblena, tamu my padrychtavali i ŭ bližejšyja dni ŭviadziem pakiet mier ekanamičnaha reahavańnia na tyja abmiežavalnyja dziejańni, jakija pryniatyja ŭ dačynieńni da našaj krainy», — zajaviŭ premjer-ministr.
«Śpis budzie dosyć vialiki. Heta ŭžo buduć nie tak zvanyja asimietryčnyja miery i nie farmalnyja. Heta buduć ekanamičnyja miery ŭ adkaz na toje, jakomu cisku padviarhajemsia my», — padkreśliŭ Raman Hałoŭčanka
«Nastupny hod moža stać kryzisnym». Jak staryja i novyja sankcyi paŭpłyvajuć na biełaruskuju ekanomiku i ci zmohuć ich abyści?
