U ES prapanoŭvajuć zrabić vakcynacyju ad karanavirusa abaviazkovaj. Hrecyja ŭviała štrafy dla hramadzian paśla 60 hod biez pryščepak
Prezident Jeŭrakamisii ličyć, što abaviazkovuju vakcynacyju treba razhledzieć u krainach ES u suviazi z raspaŭsiudžvańniem novaha štama karanavirusa «amikron». Pra zajavu Ursuły fon der Lajen paviedamlaje Guardian.
Fota: depositphotos.com
Ursuła fon der Lajen zajaviła, što 27 krain ES musiać jak maha chutčej pravieści bustarnuju vakcynacyju nasielnictva, a taksama časova zrabić abaviazkovymi PCR-testy navat dla pierajezdaŭ u miežach Jeŭrasajuza, u suviazi z raspaŭsiudžvańniem u Jeŭropie novaha štama karanavirusa.
Pakul udałosia zafiksavać 59 vypadkaŭ zaražeńnia novym štamam karanavirusa «amikron» na terytoryi ES. Va ŭsich vypadkach chvaroba praciakała sa słabymi simptomami albo asimptamatyčna.
U sieradu na pres-kanfierency ŭ Bruseli Ursuła fon der Lajen, a jana była lekaram da taho, jak pryjšła ŭ palityku, zajaviła, što Jeŭrasajuzu pryjšoŭ čas zadumacca nad abaviazkovaj vakcynacyjaj ad karanavirusa.
Pieravažnaja bolšaść nasielnictva ES moža pryščapicca, ličyć prezident Jeŭrakamisii. Tak, jość małyja dzieci ci ludzi z supraćpakazańniami, jakija nie mohuć vakcynavacca, ale na siońnia, na žal, treć žycharoŭ ES nie vakcynavałasia, adznačyła Ursuła fon der Lajen. Płata za heta — zanadta vialikaja.
Fon der Lajen padkreśliła, što rašeńnie pra abaviazkovuju vakcynacyju musić prymać kožnaja kraina samastojna, jana tolki vykazała svajo mierkavańnie. «Ale ja liču, što heta dyskusija, jakuju treba vieści», — dadała fon der Lajen.
Tema abaviazkovaj vakcynacyi nabiraje abaroty ŭ Jeŭrasajuzie. Niadaŭna paviedamlałasia, što budučy kancler Niamieččyny Ołaf Šolc vykazaŭsia ab padtrymcy hetaj idei, a Aŭstryja ŭžo abmiarkoŭvaje, jak pravieści abaviazkovuju vakcynacyju ad kavidu ŭ lutym 2022 hoda.
Hrecyja abviaściła pra ŭviadzieńnie štrafu dla svaich žycharoŭ, jakim bolš za 60 hod i jakija nie pryščapilisia ad karanavirusa (sto jeŭra za kožny miesiac).
Zakon pačnie dziejničać z 16 studzienia 2022 hoda. Pavodle premjer-ministra Hrecyi, 9 z 10 čałaviek, jakija pamirajuć ad karanavirusa ŭ krainie — starejšyja za 60 hod. 8 z 10 pamierłych — niepryščeplenyja.
U toj samy čas brytanski ministr achovy zdaroŭja Sadžyd Džavid skazaŭ, što Brytanija naŭrad ci kali-niebudź zrobić vakcynacyju abaviazkovaj dla ŭsiaho nasielnictva.